《小傳日記》拼多多跑贏巴巴（０９９８８）震撼孖屐，差唔多炒得股嘅都一定有講起過。
拼多多「炸裂」嘅業績，令孖屐又再討論起電商行業。
今日美團（０３６９０）公布旗下自營零售品牌「美團買菜」升級，即日改名做「小象超市
」，正式喺北京、上海、廣州、深圳、武漢、蘇州等多個城市上線。小象超市定位為「３０分鍾
快送超市」，提供一站式買餸兼送上門。尤其新ｌｏｇｏ入面標明「美團自營」，即係美團未來
唔只係「為他人作嫁衣」係親自作為電商賣貨。
電商業務就係吸引到公司不顧一切都要做，做補習嘅去做電商，做電視嘅又做電商，做外賣
嘅都做電商。個個都做電商，就係貪電商高流量、快回本嘅特色，所以唔少得返半條命嘅公司，
都係靠電商翻身，東方甄選（０１７９７）同ＨＫＴＶｍａｌｌ（０１１３７）就係成功例子。
而家神州消費力低下，呢個關頭做電商都係鬥平，主攻下沉市場，好少人再行京東
（０９６１８）賣出高端產品嘅路線，多數都係賣餸，因為可以唔ｓｈｏｐｐｉｎｇ，但唔可以
唔開飯，餸係一定要買。所以當初東方甄選轉行第一炮都係賣農產品，貪嘅就係嗰種「必要性」
。
美團而家都搶住做買餸，但係拼多多、盒馬、東方甄選，再細啲仲有叮咚買菜，都係買餸
ａｐｐ，美團再做都只係年晚煎堆，為免個餅被人分薄。
不過電商一定要高流量先可以實現快回本嘅特色，但係喺香港只係得８００萬人，多人極都
好難複製到神州情況，所以兩間本地嘅電商嘅處境就會比較尷尬。今年以來美團大舉攻港，半年
多啲已經送?全港，如果美團係咁銳意做買餸市場，亦都正好解釋點解ＨＫＴＶｍａｌｌ呢個年
尾要大力宣傳買餸方便，正好預先提防美團打蛇隨棍上。香港人習慣好難改變，做咗第一個買餸
ａｐｐ，第二個買餸ａｐｐ進場就會提高難度，第三個就更加難，所以ＨＫＴＶｍａｌｌ就正係
想以最快速度、有幾多得幾多搶佔電子買餸嘅份額，請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
【你點睇】港隊參加奧運氣勢如虹，你認為港隊可獲多少獎牌？會點支持港隊運動員？► 立即投票
