《小傳日記》明正言順「掛羊頭賣狗肉」，真係幫襯就一鑊熟！

　　《小傳日記》光天化日嘅香港都竟然有人光明正大咁賣狗肉，正當大家群起撻伐公然賣狗肉
，竟然揭發原來係以賣狗肉嘅騙案，開宗明義係「掛羊頭賣狗肉」。
　　事緣啱啱過咗嘅周末開始，ＦＢ上面忽然有ｐａｇｅ圖文並茂公然賣狗肉，其中一個叫「玉
鼎」嘅ｐａｇｅ，１０月５號開Ｐａｇｅ，到兩日前第一個ｐｏｓｔ就已經賣狗肉，大大隻字寫
住「掛羊頭賣香肉」。仲有「藥財湯香肉煲」同「砂鍋燜香肉」可以揀，兩斤３２８銀起賣，之
後每斤１５０銀。
　　咁張揚結果就招來警方調查，結果發現竟然係騙案。警方提到，當有人ＰＭ落單之後，就會
要求落單人士ｄｏｗｎｌｏａｄ一個叫「送達百貨」嘅ａｐｐ，騙徒可以經個ａｐｐ要求取得網
上銀行嘅登入資料，其後再以此轉走落單客人嘅錢，而安裝唔到ａｐｐ嘅客人，就會被要求轉數
３０銀去到「香港流浪狗之家」嘅捐款戶口。警方公布由９月至今已經接到１０單報告，涉及損
失超過１１４萬銀。
　　不過睇返成件事，就算警方未公布都已經疑點重重。首先個ｐａｇｅ只係開咗個半月，咁新
嘅ｐａｇｅ本身就已經好可疑，而且通常新舖開張第一個ｐｏｓｔ都會好多詳細資料，又或者係
會有好多開業優惠等等，呢個ｐｏｓｔ作為新舖第一個ｐｏｓｔ都極為簡陋。另外，香港法例寫
明係買賣狗肉都係犯法，咁公然賣狗肉，就算真係交到貨都好有可能唔係狗肉。
　　又有一點幾神奇，假如無用到ａｐｐ，騙徒就會叫人將錢守轉入香港流浪狗之家，雖然事後
有人信以為真以為流浪狗之家真係以救狗名義賣狗，不過隨後已經有大批網民證明流浪狗之家嘅
清白，而流浪狗之家負責人Ａｎｇｅｌａ亦都澄清絕對無涉及今次件事，帳戶係被盜用作不法用
途。
　　事實上用賣狗肉作為行騙手段本身就唔係一個精密行騙手段，香港主流意識都唔支持食狗肉
，出得呢種ｐｏｓｔ都一定會引起大眾嘩然，咁高調嘅騙局一定會惹人懷疑，只可以講就算係扼
人都唔係一個精明嘅手段。站喺道德立場，如果食狗肉係唔道德，當有人以扼錢手段去懲罰食狗
肉嘅人，又邊個先係唔道德呢？請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。