《小傳日記》廣州車展今日開始，比起年中舉行嘅上海車展，似乎各大車企都比較重視年底
呢一次，可能臨近年尾都想谷起盤數，二來愈近農曆年換車意欲都大啲，所以唔少公司都趁今次
車展發布新車。
其中華為同賽力斯（滬：６０１１２７）嘅旗下金系列就喺今次車展發布Ｍ９，係第一次有
實體車亮相人前。據報今次Ｍ９喺今日之前就開始盲訂，即係未見過車就已經落訂，至今已經賣
超過３萬架，預計增程版如純電版都賣大約５０萬至６０萬人仔。
雖然華為任正非之前就大大聲話「華為不造車」，不過同賽力斯搞問界都咁耐，事實上如果
華為真係要用自己牌頭造車，分分鐘同小米（０１８１０）會有一場惡鬥。華為自己研發嘅鴻蒙
系統如今已經喺問界靈活運用，如果要學似小米咁製造一個「手機＋汽車＋家居」嘅生態圈，都
唔係無能力。
不過今年４月任正非重申「華為不造車」，而今次個「誓」嘅有效期係５年，比起上次３年
又長咗。據講當時問界好多宣傳資料上面嘅牌頭都由「ＡＩＴＯ問界」變成「ＨＵＡＷＥＩ問界
」，令人不禁以為華為終於要破戒，後來任正非強調唔可以再用「ＨＵＡＷＥＩ問界」先無再用
。
年初華為ＣＥＯ余承東針對同江淮汽車聯手造車嘅傳聞，就回應話雖然華為已經具備造車技
術，不過開廠房買生產線更加浪費人力物力，不如好似而家咁提供軟件上嘅供應，主力研發智能
駕駛系統仲好咁話。
的確如今神州車市都百花盛放，再出一部「華為汽車」都難有大嚿肉食，如果做系統供應商
，話唔定可以開創更加多同唔同車企合作嘅機會，潛在發展可能仲多，請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
【你點睇】有議員倡向來港高才專才派2萬元生育獎金，你認唔認同？► 立即投票
