《小傳日記》今個星期市況悶到不得了，好唔容易終於捱到最後一日，希望下個禮拜北水返
來可以活躍吓呢一池死水。
不過就係咁靜局之下，就照有新股敲鑼上市，講緊就係天圖投資（０１９７３）。天圖被譽
為「國內創投第一股」，全球發售約１﹒７３億股Ｈ股，最初計劃國際同香港分別佔九成及一成
。不過ＩＰＯ反應都好差吓，香港公開發售一共１４６９份有效申請，股份認購不足，得嗰兩成
六，所以經過重新分配後，香港及國際發售比例改為２﹒６３％及９７﹒３７％，最終以接近下
限的６﹒５銀定價。
雖然又係乜乜第一股，不過呢啲稱號對於ＩＰＯ真係零幫助。天圖無懼成交低微，專登揀喺
黃金周期間上市，結果今日開市破發，最低仲見過４﹒４９銀，以收市價４﹒８８銀計每手
４００股要蝕６４８銀。可能咁嘅反應就正正係要揀黃金周上市，博人少少沽得無咁甘，不過事
實上今日收市價都比招股價大跌兩成半，沽得都好甘。再唔係就係極度等錢使，無論如何都要上
咗先算。
唔同為天圖ＩＰＯ種草嘅文章都有提到，天圖做創投嘅對象好多時都係內需公司，好大一部
分都係零售食品股，包括周黑鴨（０１４５８）、百果園（０２４１１）、奈雪的茶
（０２１５０）同飛鶴（０６１８６）等等。都難免天圖上市破發大跌兩成半，望到呢幾隻股嘅
名都難免怕怕。雖然話天圖喺呢堆公司初創階段入股，上市成功之後可以釋放唔少最初嘅價值，
但係呢幾隻股十之有九上市之後都表現奇差，愈跌愈殘，甚至仲未收復返招股價。
就算計返基本面來講，天圖針對內需市場投資，如今神州內需市場都好淡靜，人民消費意欲
整體唔高，天圖做開呢方面嘅話未來半年至一年前景都比較淡，所以都比較難吸引到資金入股，
結果就出現兩成六認購額嘅慘況，但係天圖都堅持上市，可想而知等錢使嘅程度。股民難揀內需
股買，天圖都一樣，請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
【你點睇】國家隊奧運健兒訪港，有市民指難以購票感到遺憾► 立即投票
