《小傳日記》魚缸中秋節，北水先行放假。不過趁北水放假，魚缸就獨自開Ｐａｒｔｙ，升
成４００幾點，最多仲試過成５００幾點，唔通係想肥水不流別人田？不過全日成交得６００幾
億銀，都算唔上肥水，食嚿月餅都肥啲。
自從阿爺開完會宣布要「活躍資本市場」，之後就推咗減半徵收證券交易印花稅等等嘅措施
出來，雖然只係Ａ場而唔係直接有利魚缸，不過都叫活躍咗一陣，而家咩利好都消化曬。記得嗰
時７月底提完「活躍資本市場」，８月底就有正式措施出來。不過等到嗰時，香江呢邊先由財爺
領頭成立研究小組研究，到而家都未有聲氣，而減唔減交易印花稅，財爺都仲話要諗諗先。
近排有人喺ＦＢ些牙返啲舊報道，話「煲呔曾」２０１７年接受訪問嗰陣提到，１９９８年
金融風暴入市抵抗索羅斯嗰陣，成個過程都係由特區政府主動運作，整個過程都係自己安排，入
市後先通知中央，結果成功擊退索羅斯。
睇返自８月底話要成立研究小組以來，港府至今都未有公布新措施。雖然環境唔同，不過以
前出手嘅積極性比起而家真係大得多，要救市就馬上行動。而魚缸乾塘咗咁耐，財爺都仲研究緊
有咩方法可以「活躍資本市場」，但係魚缸已經跌穿過１７５００，而且唔擔保會唔會再穿。
目前來睇可能要到１０月底《施政報告》先有機會見到可能會有嘅新政策，唯有再等吓先啦
！再等等啦！請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
【你點睇】機管局獎勵航空公司增往來香港航線，措施能有效推動航空業復常？► 立即投票
