《小傳日記》魚缸繼續弱勢，雖然拗升上返１７５００，不過總成交都唔夠８００億，咁樣
頹升法都唔知升得幾耐。不過悶市總有奇葩，今日輪到醫藥股突圍，全線造好，其中最標青就係
隻藥明康德（０２３５９），最多曾急升超過８巴仙，一棍大破８８銀同９２銀阻力位，高見
９４﹒０５銀，創２月中以來新高，睇來要上返１１０銀都唔係難事。
而消息方面，藥明康德公布旗下附屬上海合全藥業，喺常州同泰興兩個生產基地，分別都擴
建多肽生產線產能，希望提升ＷｕＸｉ ＴＩＤＥＳ平台嘅能力同產能，新產能預計今年１２月
投入使用，到時公司嘅多肽固相合成反應釜體積將會由２萬升增加到３﹒２萬升。藥明康德就提
到，ＷｕＸｉ ＴＩＤＥＳ係點到點ＣＲＤＭＯ（共同研究、開發與生產）平台，可以為寡核苷
酸、多肽等等相關化學偶聯藥物提供ＣＭＣ研究以至生產嘅一站式服務。
就咁睇啲化學名詞都幾難明，不過其實係平時常見嘅。多肽係蛋白質嘅組成分子，不過結構
簡單一啲，亦都更加容易被人體吸收。而核苷酸就係組成ＤＮＡ嘅基本單位，其中一種近期最常
見嘅核苷酸，就係煙酰胺單核苷酸，亦即係ＮＭＮ。
有睇廣告都會見過近年好多間保健品公司都開始賣ＮＭＮ，經常廣告都會用「逆齡」等等字
眼來強調功效。網上資料見到，ＮＭＮ可以轉化成ＮＡＤ＋，促進新陳代謝、活化體內的長壽蛋
白、修復受損ＤＮＡ等等功效。功效多多，不過單係一句「逆齡」就已經令ＮＭＮ熱爆，加上多
肽可以為身體補充膠原蛋白，提升皮膚彈性，令到間間保健品公司都爭住開賣呢類產品。
所以，藥明康德擴大多肽生產線產能，正正係搶攻美容保健品嘅上游市場，女人錢容易搵，
所以今日孖屐都借勢炒上藥明康德，請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
【你點睇】有議員倡向來港高才專才派2萬元生育獎金，你認唔認同？► 立即投票
