《小傳日記》蔚來的未來，賣電話係招財定破財？

　　《小傳日記》魚缸近期乾塘，有貨無人接，去到今日終於試穿１７５００。大市要跌就各行
各業都要跟跌，車股呢個月以來都好慘情，截至今日為止，理想（０２０１５）、小鵬
（０９８６８）同蔚來（０９８６６）都分別要跌一成四、一成三同兩成四，難免都令人懷疑究
竟造車仲係咪神州最好景嘅行業。
　　如今就連造電話嘅都爭著想造車，就可以知道賣車係有幾旺。不過正因為已經白熱化階段，
每間公司都一定要有啲殺手鐗先可以企得住腳。好似ＢＹＤ（０１２１１）就已經係龍頭，刀片
電池方面已經獨佔鰲頭，同時係因為咁，更加可以為自己創造一條龍生產線，提升效率。
　　而跟喺後面嘅新勢力更加鬥得難分難解，理想率先跑出，最主要就係高端策略成功，性能好
又賣得到；另外小鵬最勁就係泊咗好碼頭，獲得福士入股開發新車，雖然實際上係互相搭救對方
，不過面對七國咁亂嘅汽車市場，好似結盟先係變強嘅方法。
　　至於蔚來，由最初身為「蔚小理」嘅頭位，而家已經敬陪末席，當然就要諗多啲計仔。雖然
之前都成功搵來阿布扎比政府入股，籌到１１億銀美金返來，不過同小鵬唔同，小鵬同福士簽約
，有錢有招牌有技術，但係蔚來拼來中東基金入股就真係只有錢，相對之外比較失色。
　　所以蔚來就周身郁，造車之餘又走去造電話，算係咁多間車企入面第一個造電話。雖然老闆
李斌強調造電話係為咗配合架車來用，不過一部入場費都要６４９９人仔，一推出孖屐就已經勁
彈，本業未做好就踩過界，又瘀佢一個ａｐｐ搞得掂嘅嘢要勞帥動眾搞部電話出來。
　　不過「李斌的宇宙」似乎並未止於電話，據講仲想造埋耳機、智慧手錶等等。如果各樣電子
產品都陸續登場，似乎就係想成為小米（０１８１０）一樣咁嘅做法，將產品滲透係各個生活場
景，正面同小米開戰。既然小米踩過界造車，蔚來就調轉搶攻電話家電市場。
　　雖然個個都話本業未做好有咩條件做多瓣，不過有頭髮邊個想做瘌痢，本業夠食又使乜撈多
瓣？不過有趣嘅係，本業做得好又唔會想做樣自己唔熟嘅嘢，正如ＢＹＤ都唔會造電話，所以真
係搵食艱難，請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。