《小傳日記》曾經大搖大擺搞淘寶直播帶貨，講到直播銷售額突破一億銀，不過最新公布嘅
ＴＶＢ（００５１１）業績都非常令人失望，以為直播可以幫到份成績表，點知中期虧損仲由上
年同期２﹒２４億銀，擴大到４﹒０７億銀，即係直播帶貨都係雷聲大雨點小。
因為成績差，有本地傳媒仲報話主席許濤同總經理曾志偉要引咎辭職。不過噚晚ＴＶＢ就漏
夜回應話報道唔係事實，話許濤同曾志偉將會繼續帶領集團營運前進。另外，報道仲話未來
ＴＶＢ製作重心將會北移，以神州作為製作基地，不過ＴＶＢ都係一一否認。
睇返份成績表，淘寶直播就屬於「電子商貿業務」一欄，今年上半年收入就係２﹒７１億銀
，反而上年同期就係４﹒６１億銀，即係淘寶直播嘅幫助根本多極有限。ＴＶＢ就解釋，主要係
因為疫情過去，消費者重新出街買嘢令網購需求受挫。ＴＶＢ就話，預計直播環節下半年會逐步
增加，預計活動會帶來更多收入貢獻。
對於網上傳聞，ＴＶＢ噚晚出完聲明都唔夠，今日仲會由許濤親自開記招回應。噚晚個聲明
就話「許濤同曾志偉將會繼續帶領集團營運前進」，但係就無講實會唔會有職位調動。有傳
ＴＶＢ已經請咗７８歲嘅前總經理何定鈞出山，接替曾志偉再做總經理，何定鈞就表明不予置評
。事有湊巧，早一日就有報道話曾志偉因為動脈瘤而去咗台灣做手術，阿女曾寶儀都回應確認消
息，亦都證實曾志偉暫時參與唔到幕前工作。
曾志偉出走台灣，同時又傳高層大地震，一切時間都啱啱好，唔通曾志偉真係會以「另一個
身份」來「帶領集團營運前進」？請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
【與拍賣官看藝術】常玉作品屢創天價，背後其實藏著跌宕起伏的人生► 即睇
