《小傳日記》港股可謂低處未算低，恒指萬八關終於都要穿一穿，今朝曾低見１７９００，
起碼有三千幾隻牛證打咗靶。神奇在，之後恒指持續抽升，仲倒升過添。晏起身嘅炒家好可能以
為咩事都無發生過，但手持嘅恒指牛就唔見咗！
實情今日恒指點解會大插（其實都唔夠５００點），又點解一度全數收復失地，真係唔知原
因係咩。內地經濟數據唔係今日嘅事，你話係因為尋晚聯儲局公布嘅７月議息會議紀錄，顯示決
策委員認為通脹仍然有明顯上升嘅風險。不過，聯儲局加息啫，但內地傾向減息，日前仲下調
ＭＬＦ利率。港股一早同美股脫勾，而且恒指成分股絕大多數係中資股，內地經濟同政策先至係
主導恒指表現嘅主要因素！
不過，恒指上星期連續三日測試１９０００心理關口，結果呢個星期一就裂口隊穿呢個支持
位。咪話要重上萬九點，連少少嘅彈力都無，馬後炮就應該係上星期已經部署向下殺牛，結果呢
個星期，四日最多已經跌咗１１７５點，大約每日跌３００點。
下晝恒指已經企穩仲開始倒升，直覺已經短線見底，咁如果睇恒指短線反彈，咁應該就買恒
指牛證或者重磅藍籌。由於幾隻大嘢都出埋業績，而且仲唔錯，截至６月底止三個月，阿里
（０９９８８）勁賺３４３億人仔，按年增長５１％；騰訊（００７００）賺超過２６１億人仔
，按年增長４１％。港交所（００３８８）都賺逾２９億港銀，按年增長３４％。
業績炒完，仲有咩負面因素令淡友乘機大開殺戒？所以我估恒指嚟緊嗰兩星期會反覆向上，
試番１９０００先，較大波幅變成萬八至兩萬，１９０００上下５００點波動機會較大。騰訊似
見完橫行區底，可以博上３６０銀，收穿３１５銀止蝕，聽日落番３３０銀可買。請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
【你點睇】港隊參加奧運氣勢如虹，你認為港隊可獲多少獎牌？會點支持港隊運動員？► 立即投票
