《小傳日記》早兩日奈雪的茶（０２１５０）就公布終於要開放加盟店，早喺上年底最大對
手喜茶宣布搞特許經營之後，一直都有聲音討論奈雪會唔會跟住搞，時隔大半年都係要搞。
一路以來喜茶同奈雪都係鬥得難分難解，一直都係二奶命嘅奈雪都好希望爭得贏喜茶。不過
喜茶都唔係好「恰」，一路以來做細店策略，靠低價高人流策略來同奈雪撼過。而呢個策略正正
就同奈雪想行「大店＋第三空間」嘅理想背道而馳，但偏偏茶飲零售就係呢條橋先賺到快錢，令
到奈雪都無得唔跟喺呢個方針之上，一邊做大店，一邊都要做返高人流量而單價要低嘅路線。
而今次搞加盟店，都係喺喜茶之後，好明顯都係要追住喜茶嘅步伐。其實本身以奈雪想打造
休閑空間都好唔同，如果要維持到奈雪堅持嘅質素，做加盟店係會容易兼顧唔來。所以比較起其
他茶飲店，加盟奈雪最低入場費就要９８萬人仔，加埋舖租同人工就一定過百萬。相比之下，加
盟喜茶最平５０萬銀就可以，加盟蜜雪冰城最平３７萬就可以，所以奈雪比起上來係貴一倍有多
。
上年年底有人問過奈雪老闆、網名「奈雪」嘅彭心就話，有人同佢講堅持開大店成本會好重
皮，不過佢自己話好希望可以將呢份堅持做落去。所以，加盟奈雪其中一個要求就係要確保舖面
面積最少都要有９０平方米，咁先可以提供足夠嘅空間體驗。另外，要求單位店加盟嘅加盟人要
有１５０萬銀以上流動現金，而且要有兩年以上餐飲管理經驗，而且年紀要係２５至４５歲，全
職經營，學歷大專以上優先，每日唔可以開少過６個鐘，每月唔可以少過１３０個鐘，可以睇到
奈雪對於加盟嘅要求都非常嚴格。
總知一切新嘢都要試咗先知，面對喜茶嘅唔同招數，奈雪堅持大店之下都要跟住喜茶嘅方向
來做，但一唔覺意失咗自己嘅風格可能仲危險。而加盟店策略成績係點，由於係今個月先公布，
最快有消息可能都要等到１０月公布第三季營運數據先見得到，請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
【你點睇】烏軍攻入俄國庫爾斯克州近兩周，並炸毀兩座重要橋樑，你認為俄烏戰爭會否急劇惡化？► 立即投票
