《小傳日記》早兩個禮拜恒指公司終於正式宣布，１１月起主要上市的外國公司就可以納入
恒生指數及恒生科技指數選股範疇。而最大機會叫胡染藍嘅就係ＰＲＡＤＡ（０１９１３）同新
秀麗（０１９１０），呢兩隻都係外國公司之餘市值夠大，日均成交額都有幾千萬，所以明係港
交所畀好牌佢哋上。
唔知係咪想陣香港味重啲，就喺港交所公布之後，新秀麗就宣布搵咗Ｊｅｆｆｒｅｙ魏浚笙
來做代言人。今次係新秀麗第一次搵香港明星代言人，之前都只係搵過韓星李棟旭同神州嘅楊洋
做代言人，第一次就用一位新晉藝人做代言人，可以見到新秀麗未來嘅目標應該都想主打年輕人
市場。
同股票Ｎｕｍｂｅｒ一樣，新秀麗１９１０年喺美國創立，２０１１年就正式喺香港上市，
上市至今都１２年，所以都算係老牌公司兼老牌股票。不過Ｊｅｆｆｒｅｙ可以話係香港現今新
一代嘅當紅藝人，各大類別品牌廣告都見到，寶礦力、藍妹、譚仔（０２２１７）、保誠
（０２３７８）、ＢＣＴ等等，金融到食品都見到佢，堪稱係廣告寵兒，加上只係２５歲，絕對
係年輕一代嘅代表，新秀麗搵得佢，好明顯都想令人耳目一新。
新秀麗難得請代言人，一請就唔手軟。呢輯廣告特登去法國拍，由Ｊｅｆｆｒｅｙ拖住篋喺
法國街頭，靚人靚景都夠曬賞心悅目，同時都為新秀麗呢個名增添返份年輕活力。
Ｊｅｆｆｒｅｙ自己喺ＩＧ都話，今次都係佢第一次去到歐洲拍廣告，仲多謝埋品牌同團隊合作
。
雖然如果講染藍，二揀一嘅話孖屐普遍都估ＰＲＡＤＡ大機會啲，始終恒指公司一向都對大
市值比較偏好，ＰＲＡＤＡ到今日為止市值成１５２５億銀，計落實係大成數一啲。不過新秀麗
市值都有３４８億銀，同目前藍籌入面最細市值嘅碧服（０６０９８）（３１２億銀）同恒安
（０１０４４）（３５４億銀）都差唔多，算係過到門檻，所以都可以話係染藍黑馬，唔知今次
搵代言人又有無幫助呢？請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
《說說心理話》【怪獸家長必學】點樣幫仔女溫書不傷感情？培養上進心唔係靠鬧？子女一旦失控教你點應對！► 即睇
