《小傳日記》ＡＩ熱潮比起早兩個月的確係有冷卻咗啲，雖然各式各樣嘅ＡＩ產品都陸陸續
續出緊，不過瑞銀點評Ｇｏｏｇｌｅ母公司Ａｌｐｈａｂｅｔ嗰陣都點出咗重要一點，雖然ＡＩ
仲有增長空間，但係要等目前嘅ＡＩ產品賺到錢都仲要時間，所以目前投資ＡＩ概念嘅風險都相
對提高，仲將Ａｌｐｈａｂｅｔ降ｇｒａｄｅ至「中性」。
的確而家講起ＡＩ都係玩票性質，譬如ＣｈａｔＧＰＴ好多人都係同佢傾吓偈，又或者打啲
嘢來測試佢智力；又或者美圖（０１３５７）之前出嘅ＡＩ繪圖都只係停留喺「玩吓啫」嘅程度
。不過近期香港好興一種ＡＩ，就係ＡＩ歌手。
最初其實係某位用家，將林家謙首《一人之境》用ＡＩ轉聲轉成係尹光把聲來唱，除咗獨特
嘅地道唱腔高度還原，仲連Ａｄ－ｌｉｂ都有埋，條片到今日上架兩個禮拜左右就已經超過９０
萬ｖｉｅｗｓ！之後ＡＩ尹光仲出多咗好多首翻唱其他後輩歌手嘅歌，側田、姜濤嘅歌佢都唱過
。甚至後來仲驚動「真．尹光」都出來聽吓。
而咁多ＡＩ歌手入面，相信最有感覺都係ＡＩ黃家駒。適逢今個月係黃家駒逝世３０周年，
有人就將用ＡＩ仿製返黃家駒嘅聲線來翻唱咗陳奕迅嘅《單車》。一聽落，無十成都有九成，有
唔少老ｆａｎｓ都留言話呢個ＡＩ嘅仿製係最貼近黃家駒嘅聲線，所以就算明知唔係真人，都依
然聽得感動。而製作「ＡＩ黃家駒」嘅原作者都留言講到，深明家駒聲音係獨一無二，ＡＩ都無
辦法完美複製佢嘅聲線，目前都只係盡力做到最好，希望藉此畀老ｆａｎｓ懷舊，同時用新一代
流行曲令後生一代聽到家駒同Ｂｅｙｏｎｄ嘅聲音。
由呢期嘅ＡＩ歌手熱潮可以睇到，除咗有趣之外，ＡＩ仲可以做到懷愐嘅效果。雖然ＡＩ始
終唔係真人，不過當佢越來越真，自願相信嘅人就會相信，相信可以填補內心嘅情感缺憾。由
ＡＩ歌手ＭＶ嘅ｖｉｅｗｓ數睇到，呢一種同情感嘅扣連好有可能會係ＡＩ技術發展嘅其中一個
面向，如果可以複製更加多已經聽唔到嘅聲音，相信未來嘅需求空間都唔細，請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
【與拍賣官看藝術】常玉作品屢創天價，背後其實藏著跌宕起伏的人生► 即睇
