《小傳日記》魚缸愈來愈悶，就快又到聯儲局議息，打前而家個個都眼望望唔敢入市，加定
唔加都仲有好大空間，無話一定唔會加，所以呢期成交又跌到得返８００億銀，唔知係咪議息前
都係咁悶呢？
早排ＴＶＢ（００５１１）搞到第九場淘寶直播，一晚銷售額終於達到過億人仔，第二日股
價又炒起４７巴仙。見到ＴＶＢ咁好搵，連個價都可以鯉魚翻身，永恒嘅亞視（００７０７）都
唔執輸要搞埋一份。早兩日亞視公告，正式開始進入電商直播業務，由廣西亞視鴻鵠電子商務同
亞視文化傳媒（深圳）兩間間接全資擁有嘅子公司負責經營。亞視話，相信直播業務可以為集團
喺媒體、文化及娛樂業務上作為輔助，可以提高市場佔有率，從而增加集團收入。
電視台做直播電商都唔係只得ＴＶＢ，Ｖｉｕ啱啱開台嗰陣，就已經試過做直播帶貨，直接
喺電視度做，不過當時應該就反應麻麻，所以好快就無再做落去。而家亞視見ＴＶＢ搞得咁過癮
，又行返以前條舊路人搞佢又搞。ＴＶＢ起碼都係同淘寶合作，個個都識得，不過亞視搵旗下兩
間子公司搞，完全無人識，亦都未知會同邊個合作，所以噚日炒起少少，就要倒跌８巴仙。
先唔好睇亞視ＯＴＴ平台瀏覽人數，齋睇ＹｏｕＴｕｂｅ ｃｈａｎｎｅｌ，最見得人已經
係阿儀條ＭＶ，有過百萬就來二百萬ｖｉｅｗｓ，其他過十萬ｖｉｅｗｓ嘅片都係得十條八條，
如果搞直播又真係有幾多人睇呢？就算係主要市場返神州，除咗阿儀之外，亞視都好難好似
ＴＶＢ咁有一啲有叫座力嘅星來坐陣做直播，要搞到好似ＴＶＢ咁賺都有好大難度，請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
《說說心理話》【怪獸家長必學】點樣幫仔女溫書不傷感情？培養上進心唔係靠鬧？子女一旦失控教你點應對！► 即睇
