《小傳日記》蘋果新出ＭＲ眼鏡要價三皮！好似科幻片咁神奇？

　　《小傳日記》魚缸反彈兩日之後唔係好夠力，今朝都仲升緊２００幾點，晏晝無曬升幅之餘
仲要倒跌，睇嚟都仲要整固多陣。
　　其中今日隻高偉（０１４１５）今日要暴跌差唔多兩成，雖然蘋果噚日就公布咗最新嘅ＭＲ
眼鏡Ｖｉｓｉｏｎ　Ｐｒｏ，不過就賣成３４９９美金，即係差唔多２８４４０銀港紙，仲最快
都要到下年先可以出貨，全世界都都覺得定價偏貴，而且遲出貨，所以普遍都唔睇好銷情。就係
咁，有關Ｖｉｓｉｏｎ　Ｐｒｏ嘅零件供應商都要捱沽。
　　睇返呢架Ｖｉｓｉｏｎ　Ｐｒｏ，叫得ＭＲ就係混合實境，即係將虛擬元素融入到現實世界
入面。雖然上網就可以搵到介紹片嚟睇，不過簡單啲講，就係當戴起Ｖｉｓｉｏｎ　Ｐｒｏ，就
可以將本身係ｍｏｎ見到嘅嘢放大到眼前嘅現實環境入面，可以好似科幻片咁將幾個ｍｏｎ喺自
己眼前浮咁樣。
　　其中一大重點，就係可以唔使用控制器。以往打ＶＲ　ｇａｍｅ都要攞住個控制器，不過
Ｖｉｓｉｏｎ　Ｐｒｏ就唔使，因為有眼球追蹤同手部追蹤，戴住只要郁郁隻眼望一望，就可以
好似喺部ｉＰａｄ咁撳到想要嘅ａｐｐ，就咁用手凌空就可以放大縮細。
　　另外因為係ＭＲ，即使睇緊眼前嘅影像，現實入面嘅環境變化都可以睇得到，譬如可以好似
而家ａｉｒＰｏｄ咁聽到環境聲，又可以當現實人有人走近嗰陣，影像會霧散開等真人出現喺眼
前，比起ＶＲ會同現實隔絕，ＭＲ仲可以同現實連繫得到。
　　睇完呢堆功能係真係值得呢個價，亦都比起同行超前得多，不過就連果粉都質疑，
Ｖｉｓｉｏｎ　Ｐｒｏ好先進，不過要嚟有乜用？因為除咗將原本ｍｏｎ上嘅影像變成好似喺眼
前之外，功能上同一部ｉＰａｄ做到嘅嘢無唔同，所以難怪孖屐睇淡Ｖｉｓｉｏｎ　Ｐｒｏ。不
過聽講嚟緊迪士尼會專登開發一啲可以互動嘅電影，咁用Ｖｉｓｉｏｎ　Ｐｒｏ就好似有更加大
嘅體驗價值，不過都要等出咗先再算，請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。