《財自密碼－何金水》下半年炒啲乜？ＡＩ晶片今年財自密碼！

　　《財自密碼》話說香港呢邊股市慘不忍睹，美股升港股唔升，美股跌港股跌得更深，皆因美
國債限令投資者憂慮，但而家咩都搞掂晒啦，又唔見港股升？所以話，一切都係想向下炒嘅藉口
。
　　呢期美國嗰邊熱炒晶片股，主要都係英偉達（Ｎｖｉｄｉａ，ＮＶＤＡ）業績炒起，ＣＥＯ
黃仁勳去轉台灣行下夜市，都可以成為話題。不過，金水我作為科技迷，都要解釋下佢炒緊乜，
其實晶片入面有一個理論叫「摩爾定律」，簡單來講究係積體電路上可容納電晶體數目，約每隔
兩年便會增加一倍。
　　不過，黃仁勳喺今年３月時講過，摩爾定律已死，根據佢嘅解釋，喺物理上再提高晶片速度
應該無乜可能，不過可以透過ＡＩ去突破。呢下就值錢啦，因為晶片進程都長期卡係３ｎｍ－
５ｎｍ之間，物理上頂盡就係咁，博客估計Ｎｖｉｄｉａ應該掌握到點樣可以係晶片入面「智能
化」咁處理數據，而唔係單單物理拚速度。所以話炒業績其實係假，背後炒緊摩爾定律先係真，
因為Ｉｎｔｅｌ已經過氣，真正同級對手，係ＡＭＤ。
　　所以下半年有乜好炒？梗係又炒返晶片股，老老實實，港股晶片股都係中資，大家都知道中
國晶片技術去到咩程度，最犀利嗰間中芯國際都仲做緊１４ｎｍ量產，１０ｎｍ提高良率，同外
國企業都仲有一大段距離，仲要成日俾美國封殺，拉攏荷蘭個班高技術唔俾你出口光刻機，惡到
呢。
　　但封殺還封殺，晶片需求就不摟都有，電腦遊戲機、手機、虛幣挖礦、到電動車，全部都要
晶片，所以下半年晶片股繼續當旺，金水個倉都要換返幾隻港股晶片概念入去，費事走寶啦。《
何金水》
　
　
　　　　　　　　　　百萬倉位如下（截至２０２３年６月１日收市）
　　　　　　　　　　＝＝＝＝＝＝＝＝＝＝＝＝＝＝＝＝＝＝＝＝＝
　
持有股份　　持有股數　　買入價　　　賣出價　　浮動賺╱蝕　　　收市價　　　　市值　　
－－－－－－－－－－－－－－－－－－－－－－－－－－－－－－－－－－－－－－－－－－
　復銳　　　　８千股　１５﹒８元　　　　　　－５﹒５萬元　　８﹒９６元　　７１６８０
海底撈　　　　１萬股　２３﹒６元　　　　　　－７﹒４萬元　１６﹒１８元　１６１８００
理文造紙　　　１萬股　３﹒６１元　　　　　　－９６００元　　２﹒６５元　　２６５００
電線廣播　　　１萬股　９﹒４８元　　　　　　－４﹒６萬元　　４﹒８５元　　４８５００
　認沽　　１００萬股　０﹒０７元　０﹒０８５＋１﹒５萬元　０﹒０８５元　　８５０００
中芯國際　　　１萬股　　１９﹒９　　　　　　　　　　０元　１９﹒９０元　１９９０００
　華虹　　　　１萬股　２５﹒０５　　　　　　　　　　０元　２５﹒０５元　２５０５００
總持貨　　　　　　　　　　　　　　　　　　　　　　　　　　　　　　　　　７５７９８０
餘下現金　　　　　　　　　　　　　　　　　　　　　　　　　　　　　　　　　７２２００
－－－－－－－－－－－－－－－－－－－－－－－－－－－－－－－－－－－－－－－－－－
　
　
＊編者按：本文只供參考之用，並不構成要約、招攬或邀請、誘使、任何不論種類或形式之申述
或訂立任何建議及推薦，讀者務請運用個人獨立思考能力自行作出投資決定，如因相關建議招致
損失，概與《經濟通》、編者及作者無關。