《小傳日記》間間都搶住做ＡＩ，連吉利都要踩過界！

　　《小傳日記》今日全民都係睇實隻象（００００５）！今朝就成朝撳住撳住升唔到，中午正
式放榜，今次就派２３美仙第二次股息，２０２２全年就派３２美仙。放榜前最期待嘅季息都有
著落，今年第一季業績就會開始派返，到出年年頭仲有可能派２１美仙特息，仲有可能額外再回
購，真係一鋪返埋嚟！不過期待成真之後就係時候散水，晏晝開市鬼馬升一升之後就大幅倒插，
最後都要跌２巴仙完場。
　　匯控晏晝仆直，連帶科技股都衰多兩錢重，今日科指跌足３巴仙有多，仲要穿埋條牛熊線，
走勢相當時不利！不過都無阻大公司衝入ＡＩ概念之中，今日就有內媒發現到吉利
（００１７５）都要同ＡＩ扯上關係。近排吉利手機旗下湖北星紀時代科技就被發現申請咗好幾
個商標，包括「孔明ＡＩ大腦」、「孔明ＡＩ」同「ＫＯＮＧＭＩＮＧ　ＡＩ」等等，不過由舊
年７月開始申請，居然最後係被駁回複審，不過吉利方面無放棄，１月３０號再次提交「孔明
ＡＩ大腦」嘅申請。
　　原來吉利唔聲唔聲就已經踩咗入ＡＩ概念之中，如果係吉利自己申請就有可能係智能駕駛，
不過係吉利手機申請，就有更加多幻想空間。照咁睇可能呢個「孔明」會係類似小米
（０１８１０）嘅小愛同學一樣，係語音搜尋ＡＩ，咁係最基本，但係而家ＣｈａｔＧＰＴ咁
ｈｉｔ，都話唔埋吉利手機會乘機轉埋做類ＣｈａｔＧＰＴ嘅聊天機械人。
　　雖然吉利做電話好似純粹係做多瓣，但係如果電話ＡＩ技術可以支援埋智能駕駛技術，就可
以同吉利汽車無縫接合，分分鐘可以做到第一架連接聊天機械人嘅新能源車，不過而家吉利手機
都未有咩聲氣，起碼都仲要多一兩年先，請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。