《小傳日記》逆向隔離就快通關，邊個行業爭住返？

　　《小傳日記》魚缸噚日低位反彈之後，到今日都仲係偏軟，不過最風雨嘅前夕都係特別零靜
，有孖屐人士就估計恒指橫行咁耐，都係時候準備爆邊，連續幾日沽空比例增加，恒指技術走勢
麻麻，但係消息面上又唔差，中概股、通關、神州泵水等等消息又憧憬緊，所以好淡雙方都各有
支持，睇嚟就快有一場龍爭虎鬥！
　　不過講起通關，呢輪通關概念都愈吹愈旺，先唔講明面消息，淨係周大福（０１９２９）爆
大冷染藍都令人大把聯想，本地零售股無端端染藍，唔通真係恒指公司「估」到通關有望所以揀
定一隻半隻入恒指？
　　今日特首李家超有傳原定係會親身上深圳，同上面官員傾通關。不過之前喺微博吹風話要上
去，上面網民都「罵罵聲」話唔想通關咁話。不過香江呢邊每日確診人數都升緊，仲要就嚟破萬
，上面防疫措施仲嚴謹過呢邊，都難怪佢哋會驚。可能為免刺激上面民情，加上深圳防控都再升
級，連科技重鎮南山區都要實行全域管控措施，所以最後特首都係視像開會算數。
　　會後就公布，廣東同深圳政府都同意「逆向隔離」，即係市民北上前會先喺呢邊設施隔離，
然後以密封方式入境，取代現時喺上面嘅７日酒店隔離，但係細節方面都仲要再討論。
　　雖然叫做通關，不過都係開放香江呢邊可以北上，而同胞落唔落到，又或者想唔想落嚟又係
另一回事，所以周大福可唔可以受惠到通關概念都未肯定。反而要上上面傾生意嘅，就真係通關
概念，譬如保險佬就同魚缸一樣，等咗北水好耐喇，通到關之後佢哋一定爭住飲頭啖湯，請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無涉。