《小傳日記》中免上市爆疫又打風，後市仲有無得衝？

　　《小傳日記》噚日大升成７００點，原來唔止關阿爺加碼科水事，實情中概股又有最新消息
，傳緊上面計劃容許花旗國證監ｃｈｅｃｋ審計底稿，據講就會由ａｃｃｏｕｎｔａｎｔ將資料
搬來香江，花旗國人員就來香江查數。神州再退一步，好有可能係因為之前一堆國企已經宣布咗
由花旗國退市，對上面來講最敏感資金資料都已經撤離咗，所以都已經無咁驚。不過堆科技佬噚
日都已經偷步跑起曬，到今日都見攰，升得唔算多。
　　因為噚日放咗半日假，原訂噚日敲鑼嘅中免（０１８８０）牌照掛，不過真係敲鑼就扽到今
朝先搞。噚日中免都幾強，低開２４巴仙破發，收市前啱啱好收復失地，以１５８銀招股價收市
，完美上演「護發」成功。今朝上市議式嗰陣，董事長彭輝就話過去兩年疫情對集團喺機場、口
岸嘅店鋪經營產生一啲影響，但係集團採取咗好多措施，確保業績穩健高速增長，就算海南疫情
對經營造成短期影響，但集團長期向好嘅趨勢無變，仲強調相信國家嘅防疫政策！
　　其實如果撇開疫情，免稅店專賣嘅免稅煙、免稅酒可以話係神州同胞嘅送禮首選，尤期舖頭
沿火車站、機場等等嘅交通樞紐來開，好似香江舖頭開喺地鐵站都會人流多生意好一樣，免稅店
生意都應該蒸蒸日上，只係疫情累事。不過中免呢次掛牌都一波三折，先係臨上市前個幾月海南
爆疫，上市當日又遇著打風，好彩臨尾都拿返咋沙低開平收，起碼都無咁難睇。未來中免都好受
疫情左右，鍾意炒ｒａｎｇｅ嘅咪試吓博疫情嚴重低買，疫情放緩高沽囉。請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無涉。