《小傳日記》萬科分拆萬物雲，業務係乜要留神！

　　《小傳日記》魚缸反彈完一日之後又要整固，跌又跌唔落，而且總成交奀到連唔夠８４０億
銀都無，點會升得起！結果全日恒指收報２０６６１，跌１８５點。
　　內房佬彈完一日又回返落去，嚟緊都仲係前路茫茫，不過萬科（０２２０２）就喺呢個時候
大鑼大鼓咁搞分拆。萬科公布已經獲得中證監批准，分拆旗下萬物雲來港上市，將會發行唔超過
１﹒８１億股，每股１銀人仔。
　　就咁聽「萬物雲」呢個名就似係「百度雲」、「阿里雲」呢類雲端科技公司，不過其實萬物
雲就係萬科嘅物管業務，改叫「萬物雲」之前就叫「萬科物業」呢個一睇就知係物管公司嘅名。
據萬物雲自我介紹，公司係間「空間科技服務股份有限公司」，旗下有Ｓｐａｃｅ、Ｔｅｃｈ和
Ｇｒｏｗ三大模塊。
　　聽完都唔係好知做乜，不過２０２１年業績入面，社區服務貢獻營收１３１﹒６億人仔，佔
總收入５５﹒５％；另外商企同城市服務，以及解決方案服務就分別佔比３６﹒７％和７﹒８％
。身為物管股就刻意改做一個好似科技公司咁嘅名，當然係想強調公司應用雲端業務嚟做物業管
理，其中就用咗物聯網嚟連結多種社區服務，旗下開發咗「星辰」系統作為連接平台，空間裏的
設施、設備、資產、人、商業活動等都可以接入系統。
　　不過都有唔少聲音質疑，撇除呢個名，萬物雲好大程度上只係一間傳統嘅物管公司，有人就
做過研究，萬物雲一年嘅研發開資只有兩億幾人仔，同其他真嘅雲端公司每年投入閑閑哋十幾廿
億人仔真係蚊髀同牛髀，所以都係唔好當佢好似科技股咁炒，講到尾都係一隻物管股而已，請請
！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無涉。