《小傳日記》近幾日神州業主停供爛尾樓風潮愈演愈烈，以為正係恢復緊嘅內房板塊一波未
平一波又起，風暴連續第二日橫掃內房股，連帶無涉及爛尾樓嘅內房佬都要跌唔少；龍湖
（００９６０）跌多過４巴仙，報２９﹒８５銀；碧桂園（０２００７）跌多過１巴仙，報
３﹒６２銀；中海外（００６８８）跌接近１巴仙，報２３﹒１銀；旭輝（００８８４）見底反
彈升多過５巴仙，報２﹒７２銀。
今年阿爺為咗谷經濟，逐步由各方面扶持返內房嘅資金鏈運作，當中包括容許個別穩建內房
發債，亦有唔少大隻民企可以發返債，碧桂園、旭輝同美的（０３９９０）就係頭三隻可以發返
債嘅內房。為咗維持唔畀內房再犯「三條紅線」而導致債務問題繼續惡化，於是就只係畀穩建內
房發債籌期，等唔健康嘅房企自行淘汰。
但係今次事件就揭開咗呢個方法嘅漏洞；今次包括鄭州、武漢、南昌、長沙、太原、西安等
城市在內，多達５２個停工或爛尾樓盤嘅業主發布咗停貸通知書，開發商涉及恒大
（０３３３３）、新力（０２１０３）、融創（０１９１８）等，恰好呢啲都係無得重新發債嘅
開發商。而無咗發債呢個重要集資來源，當然交樓都會會延遲，所以就引發今次事件。
今次鄭州都係斷供事件其中一個主要事發地，目前仲因為村鎮銀行儲戶無法取款而陷入金融
危機，雖然江西景德鎮先係今次事件嘅發起地點，不過鄭州因為村鎮銀行事件，就更加觸發到民
眾關注爛尾樓嘅情況。
官媒《證券時報》繼噚日發表評論文章《防爛尾樓盤停供風險擴散》，今日再發表文章指出
，停貸風波反映多方困局，壓實責任求破解成當務之急。報道引述唔少經濟學者意見，包括建議
成立「地產行業健康發展穩定基金」來擺脫地產行業當前困局，同時調整「三條紅線」政策。文
章論調都係切實建議可行嘅解決問題方法，並無將事件歸咎任何一方，政策大方向主要都係聚焦
解決問題為主。不過而家無論開發商或業主都係處於缺水狀態，要喺債務唔再擴大下搵到資金來
源絕對唔易，請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無涉。
【與拍賣官看藝術】收藏界遺珠？超現實主義藝術家林飛龍注入拉美元素！► 即睇
