《小傳日記》海底撈又分拆，「海外撈」前景有啲窄……

　　《小傳日記》魚缸今日再失守埋５０天線！阿爺針對ＱＱ（００７００）同巴巴
（０９９８８）嘅反壟斷處罰今日繼續發酵，今朝就已經令魚缸面臨一大浸沽壓，加埋股神疑似
部署減持甚至係出清比亞迪（０１２１１），更加係拖累成個投資氣氛，全日魚缸都有氣無力，
全日收場跌２７９點，報２０８４４點，比亞迪墊底藍戰士唔見差唔多一成二。
　　不過跌市都總有造好股，其中一隻居然係海底撈（０６８６２），全日先跌後升。事關今日
海底撈就宣布正係考慮將旗下海外業務「Ｓｕｐｅｒ　Ｈｉ　Ｉｎｔｅｒｎａｔｉｏｎａｌ」分
拆主板掛牌，就係以介紹形式做實物分派，每持一個數量嘅海底撈就會獲派幾多股Ｓｕｐｅｒ　
Ｈｉ咁樣。
　　海底撈就話建議分拆符合股東整體利益，令到Ｓｕｐｅｒ　Ｈｉ業務同其餘業務可以喺其各
自嘅地域範圍內獲得更好發展，簡單嚟講就係跳船啦！而海底撈分拆都算係無可厚非，尤其近期
疫情疑似再度喺上海等地開始，港澳疫情又同樣反覆，分拆將會令發展緊嘅海外業務股價唔會受
大中華區嘅防疫措施而拖累，可以ｆｏｃｕｓ返海外業務增長上面。
　　不過海底撈２０２１年底有１４４３間門市，當中１３２９間位於神州，１１４間屬於港澳
同其他海外地區，但係Ｓｕｐｅｒ　Ｈｉ業務連港澳地區都唔包，變相可能只係得１００間左右
，增長空間有幾大，同埋外國人係咪鍾意食中式火鍋真係好睇佢點樣包裝。同埋真係可以剝離都
幾多？頤海（０１５７９）獨立咗咁耐，個價都仲同海底撈齊上齊落，所以呢煲「海外撈」真係
有排撈，請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無涉。