《小傳日記》騰訊衰嘢接住嚟？畀阿爺罰完再傳會裁員！

　　《小傳日記》騰訊（００７００）、巴巴（０９９８８）等科企因反壟斷法，而畀阿爺罰款
，科技股應聲下跌；馬交今日起停工７日，賭場無得開，賭股齊齊跌；內地６月通脹率創近兩年
高，上海疫情又起過，車股、內房股被狂風掃落地。你跌，佢又跌，大家都跌，魚缸當然都要跌
喇，今日曾經跌到兩萬一邊緣，非常牙煙。
　　講起科技股，騰訊唔止受到阿爺罰款嘅消息拖累，公司宣布７到８月暑假期間，內地未成年
人只可以喺每星期五、六、日嘅夜晚８到９點ｌｏｇｉｎ遊戲，其餘時間都打唔到機，令今次暑
假期間未成年人打機時間縮到得２１日。雖然呢招限打機措施都係跟番阿爺柯打做嘢，好早之前
開始ｐｌａｎ定，但今日科技股冧成咁，呢單嘢或多或少都影響到股價表現。
　　仲有，騰訊曾經公開表明要「過冬」，要繼續ｃｕｔ開支，裁員風潮有可能蔓延到香港業務
分部。據市場消息指，隨著騰訊ＣＳＩＧ事業群（雲與智慧產業事業群）近月裁員兩成，當中負
責串流音樂平台ＪＯＯＸ嘅香港員工亦可能畀人炒魷魚。雖然涉及只有約１０多個員工，但所謂
一不離二、二不離三，孖屐似乎都擔心騰訊嘅裁員消息陸續有嚟，令缸友對企業前景唔太樂觀。
　　再連埋早排畀大股東Ｎａｓｐｅｒｓ分階段減持後，騰訊走勢一日比一日弱，今日繼續畀條
１０天線頂住，並貼住保力加通道繼續落，走勢唔太安樂。阿爺監管言之鑿鑿，當黑「企鵝」好
大鑊，再唔止蝕好落魄！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無涉。