《小傳日記》唔係杭州馬某，又唔係深圳馬某某，其實係阿茂？

　　《小傳日記》魚缸噚日休完就輪到神州嗰邊休，北水停魚缸都係淡靜少少，全日就靠銀行佬
撐市，多得中銀（０２３８８）同大象（００００５），最後先可以揸住十零點收市！
　　唔知係咪上面驚魚缸悶得滯，今朝就炮製咗單猛料「辣一辣」魚缸！今朝上面央視就報，話
杭州市國家安全局依法對勾結境外反華敵對勢力，涉嫌從事煽動分裂國家、煽動顛覆國家政權等
危害國家安全活動的馬某採取刑事強制措施。嘩，咁重罪扣落「杭州馬某」身上，「孖屐」梗係
即時諗起巴巴（０９９８８）嗰位馬雲啦，以為佢又得罪咗阿爺，嚇到今朝魚缸沽巴巴快過坐飛
氈，一朝早就最多跌多過９巴仙！
　　呢邊魚缸震到放緊假嘅神州都ｆｅｅｌ到，結果就由官媒環球時報前老總胡鍚進當面澄清，
話唔係拉「馬某」，係拉咗「馬某某」，上面媒體於是就一齊改口嗌「馬某某」，於是巴巴先收
窄返跌幅。不過唔係「馬某」啫，魚缸又即時諗起ＱＱ（００７００）嗰位「馬某某」，不過呢
位「馬某某」人在深圳，斷估就唔會係杭州拉嗰個啦！
　　唔只魚缸對呢類消息杯弓蛇影，連馬雲自己都怕怕！早兩日微信公眾號就傳「馬雲藝術品投
資團隊」成功投到乾隆帝玉璽，馬雲基金會就即時出嚟大叫係謠傳，講明馬雲無買過亦都唔識篇
文所講嘅顧問，表明而家馬雲已經「歸隱田園」，專注喺學習、研究農業科技同埋鄉村教育等等
。要知道玉璽唔係一般嘅古董，喺古代係象徵國家擁有權，啱啱就係「馬某」最忌諱嗰一項，所
以先要急急腳澄清。
　　今次就證明魚缸信心真係紙咁薄，一個「馬某某」就隊冧巴巴９巴仙，繼而拖累魚缸無咗
４００幾點。不過自從馬雲消失完一排再出返嚟，已經低調返好多，其實學吓深圳「馬某某」咁
低調賺錢，「靜靜哋贏」可能仲著數，所以大家都無謂謠傳馬雲點點點喇，請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性。
本文只供參考之用，並不構成要約、招攬或邀請、誘使、任何不論種類或形式之申述或訂立任何
建議及推薦，讀者務請運用個人獨立思考能力自行作出投資決定，如因相關建議招致損失，概與
《經濟通》、編者及作者無涉。