《小傳日記》魚缸放假呢兩日期間，成個世界都發生咗好多事，最大件當然係阿爺放水啦，
ＭＬＦ無減之下，一如預期咁降準，但又不如預期咁只係降０﹒２５基點，好多人攞定盆準備迎
接阿爺天降甘霖，點知得一半，所以噚日Ａ場內銀佬要捱沽，今日Ｈ場返嚟都要跟跌！建行
（００９３９）跌近兩巴仙，報５﹒７５銀；工行（０１３９８）跌唔夠１巴仙，報４﹒７２銀
；中行（０３９８８）打個和，報３﹒１２銀。另外隻招行（０３９６８）就忽然宣布行長田惠
宇被免職，但就無講原因。今日開市招行就一棍低開一成，全日都未爬得返起身，最終收報
５２﹒９銀，跌多過一成一。
復活節假後嘅魚缸好似先啱啱開始受難節咁，上海市監忽然又約談外賣平台，要求加強管理
喺封城期間「炒貴菜」嘅無良商戶。雖然都算係惠民措施，但係就不利商家佬，一聽到「約談」
呢個ｋｅｙｗｏｒｄ，大把缸友都走夾唔唞，今朝美團（０３６９０）就低開多過５巴仙，旗下
有餓了麼嘅巴巴（０９９８８）都要低開多過３巴仙，而結果都係沽足全日，巴巴收報９１﹒５
銀，跌多過４巴仙；美團收報１４６銀，跌挨近６巴仙。
查實上海今次封城都幾麻煩，影響經濟唔在講，民生方面係非常難捱，其中搶菜方面真係唔
係我哋想像得到，要每朝６點前爬起身，部定喺各大買餸ａｐｐ準時ｌｏｇ ｉｎ爭菜，情況就
好似好讀Ｕ要ｒｅｇ科，又或者爭演唱會飛一樣，今輪爭唔到就要等下一輪，都真係幾慘，更加
有傳獨居者為求一個盲盒蔬果，更加要犧牲色相！所以當地市監都刻不容緩嚟打擊貴菜。雖然美
團繼之前限收服務費後再被約談，但實際上都係民生相關措施，同監管係唔太一樣嘅，所以對後
市應該都唔太影響嘅，請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性。
本文只供參考之用，並不構成要約、招攬或邀請、誘使、任何不論種類或形式之申述或訂立任何
建議及推薦，讀者務請運用個人獨立思考能力自行作出投資決定，如因相關建議招致損失，概與
《經濟通》、編者及作者無涉。
【你點睇】以色列遭受伊朗導彈襲擊，拜登稱不支持攻擊伊朗核設施，惟與G7領袖同意以方「合乎比例」回應，你是否認同？► 立即投票
