《小傳日記》魚缸噚日回吐番晒上個禮拜啲升幅，今日好番少少啦！叫做升住過終點，但全
日升幅只得４６點，兩萬四繼續守得住！
三位大隻佬ＡＴＭ今日好似舉啞鈴咁，舉起嚟好似力不從心咁。巴巴（０９９８８）同騰訊
（００７００）分別升唔夠半巴仙同１巴仙，美團（０３６９０）臨尾鬆一鬆手，畀個啞鈴砸親
，好彩個啞鈴唔係太重，只係跌唔夠半巴仙啫。其他科技佬當中，網易（０９９９９）同快手
（０１０２４）今日操到啲肌肉現晒形，同樣升４巴仙，京東（０９６１８）就升２巴仙。
今日最弗嘅係光伏玻璃佬，朝早跑步嗰陣，聽到收音機新聞報道，阿爺一聲令下，話要將新
能源同清潔能源「擺喺更突出嘅位置」。聽完呢單消息，有啲玻璃佬可能知道呢鋪發達喇，愈跑
愈快，愈跑愈起勁呀！信義光能（００９６８）應聲彈出，早段一飆就飆近６巴仙，全程喺前列
位置，末段以強勁之勢過終點，升８巴仙，係眾位藍戰士中，全日表現嘅冧巴溫！
不過，有喺側邊睇住佢哋跑嘅「孖屐」人士就話，信義光能早排畀啲負面消息搞到無心機，
今日借住個勢跑快啲，但最後都衝唔破條５０天線，走勢唔太靚仔。反而，喺佢身後面嘅福萊特
玻璃（０６８６５）就更加值得吼喎。福萊特玻璃呢日表現都幾好，最後升４巴仙。
冬奧就來了，但係一班體品佬就未嚟料喎！無論做掌上壓、引體上升等熱身運動，都唔係好
夠狀態，尤其申洲（０２３１３）呀，前三日都無乜事，今日就畀支大陰燭壓住咗，最後跌７巴
仙，貼晒繃帶膠布，唔止做咗全日最唔掂嘅藍戰士，前幾日力爭上游嘅努力都白費晒喇！李寧
（０２３３１）都唔好得幾多，喺翻騰嗰陣跳得唔夠高，臨尾落地隻腳拗一拗，跌咗近４巴仙。
敷一敷藥後，聽日睇下會唔會醒神番啲啦！請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式
之申述或訂立任何建議及推薦，讀者務請運用個人獨立思考能力自行作出投資
決定，如因相關建議招致損失，概與《經濟通》、編者及作者無涉。
樂本健【秋日開倉26 - 27/9】保健品低至$20！► 火速行動
