《小傳日記》京東又想搞外賣，而家先搞好定壞？

　　魚缸經歷三個幾月以來嘅艱辛，終於又重返100天線，不過咁嘅大位，都係需要啲時間測試一吓，所以今朝掂到條100天線之後，都要試返落嚟，全日最多試過跌多過200幾點，最終收報21869，跌145點。
　　呢幾日魚缸都係睇住科網佬頭嚟行，巴巴(09988)美股噚晚大升差唔多15巴仙，魚缸呢邊今朝都造好，但係收市前已經縮到得返兩巴仙多啲；加埋隻美團(03690)跌多過3巴仙，事關解封無耐嘅上海，呢幾日疫情又有些少反彈跡象，所以連帶全部零售股等都轉跌。
　　唔知係咪封控有利外送服務，有神州媒體就報話，京東計劃緊踩入餐飲外賣業務，外賣餐廳可以利用京東到家APP收柯打，由達達負責配送。不過據講呢壇嘢仲未正式推出，仲係試行階段，而家應該會喺鄭州等城市試行咗先。另外，外賣業務據報係由京東旗下京東同城嘅下餐飲業務部運行，但係當中會投放幾多人力、資金，或者實際點運行都仲未有定案。
　　其實外賣孖屐嚟講，上面已經算係出現咗啲寡頭壟斷情況，第一大係QQ(00700)持股嘅美團，其次就係巴巴持股嘅「餓了麼」，有其他公司試過入市，但係都好難做得起，譬如順豐分拆來港上市嘅順豐同城(09699)，都係想試入外賣業務，不過都係無乜起色。而且QQ旗下都有美團，而家京東又整個「京東外賣」，咪好似自己打自己咁？請請！
　
*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無涉。