《魚缸博客》長建（０１０３８）現金多多搞收購，繼續反彈無難度

　　外圍方面，侵侵同歐洲佬打好關係，雙方近日就貿易戰問題似乎有意釋出善意，外圍缸友於是將焦點放在企業業績上。香江呢邊缸友睇定定先敢行動，變化似乎唔大，成交亦唔見得太活躍。
　　面對風高浪急嘅環球大變局，善長長遠布局，一向穩打穩紮嘅長和系會唔會反而係值得吸納嘅對象？喺全球具有多個基建業務嘅長建（０１０３８），噚日（２６日）收市後公布業績，指中期純利升５巴仙，中期息每股６８港仙，按年增加１﹒５巴仙。如果撇除上年上半年度米字國同袋鼠國方面一次性收益帳，集團今年中期基礎溢利仍然錄得雙位比率增長。
　　更殺食嘅係，集團現金多多，手上揸住９６億現金，負債比率又低，往後大有能力進行多項收購。公司話正探討緊多個有潛力嘅收購方案，當中包括一個澳洲大型項目。而公司早前收購嘅米字國同袋鼠國業務亦為公司帶來唔少盈利貢獻，所以長遠嚟講，一定具備充足嘅派息能力。
　　近日長建股價由５７﹒５銀水平反彈，大和維持公司「跑贏孖屐」嘅評級，展望未來仍有動力繼續反彈破６０蚊水平，缸友不妨趁股價未爆升時上車啦！

　　《編者按》本欄搜羅即市傳聞，惟消息未經證實，《經濟通》亦不保證內容之準確性。