《小傳日記》私有化無影小股民當災，中國中藥係時候重溫狼來了！

　　《小傳日記》中國中藥（００５７０）今日股價大跌，最多瀉４５％，低位２﹒１２銀，唔
單止低過傳出私有化之前收市價３﹒４３銀，仲見十一年來最低。集團話主因係國藥集團境外直
接投資批准仍未得到滿足，導致大股東私有化建議同埋撤銷上市地位之先決條件未履行及建議失
效。
　　公告之前講到，國藥境外直接投資需要獲得中國監管機構、國資委、發改委、商務部和國家
外匯管理局的批准，但最終國藥集團都係未能闖關成功。不過呢，國藥作為央企，想出錢私有化
自己嘅囝囝，卻被國家當局「禁止通行」，實在令外界難以想像。
　　呢單私有化建議由今年２月８號停牌開始，２月２２號發公布兼復牌，話獲國藥集團共裕作
為要約人建議通過計劃安排方式將其私有化，以及撤銷上市地位，每股計劃股份註銷價４﹒６銀
，比停牌收報３﹒４３銀溢價約３４﹒１１％。復牌當日，集團股價收市升２４％，報４﹒２６
銀。之後幾個月，集團股價大致上橫行，直至６月２６日，集團股價離奇急跌１１﹒７％，不過
集團管理層並無任何相關公布。
　　其實今次唔係集團第一次話私有化。２０２１年２月初，國藥香港提出私有化計劃，有傳國
藥集團牽頭財團計劃以每股至少５﹒１０元私有化中國中藥，呢個價格較中國中藥之前一個月平
均股價３﹒８３港元溢價約３３％。當時仲傳出話國藥集團正同平安保險集團，及中國中藥執行
董事聯手展開上述私有化事項。但同年８月要約到期，國藥集團表示不再推進中國中藥私有化。
　　２０２２年１２月７日，再有消息話國藥集團考慮再次嘗試將旗下中國中藥私有化。知情人
士稱，國藥集團與顧問正在商討潛在私有化的新提議。不過傳言再次被潑冷水。集團１２月８日
發布公告稱唔會進行私有化安排。不過，喺國藥集團作出澄清當日，集團股價一度飆升兩成幾，
收市升幅收窄至１６％，但都刷新之前５個月高位。
　　消息炒來炒去，股價都被舞高弄低，而私有化就無疾而終，難得嘅係國藥集團樂此不疲，屢
敗屢戰，果然勇氣可嘉！
　　通常見到呢Ｄ個案，筆者難免小人之心，將其歸類為妖股，但今次遇到「國」字號，筆者自
然唔敢將佢同妖股相提並論。不過，長期話私有化，次次無件事，搞到小股民損手爛腳，只怕怨
氣日積月累，下次再提私有化，投資者可能就會留多一個心眼，畢竟，狼來了嘅故事三歲細路都
知，堂堂國企無理由唔知，請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。