《小傳日記》「國際金融中心遺址」定係過渡期？周凱旋字字珠璣！

　　《小傳日記》誠哥李嘉誠近期少咗露面，所以每當紅顏知己周凱旋出席場合，全世界都好想
由佢口中關心到誠哥嘅近況。噚日周凱旋去完ＦＩＩ　ＰＲＩＯＲＩＴＹ亞洲峰會之後見記者，
對每個問題嘅回答都極之耐人尋味，字字珠璣程度可以話同誠哥同出一轍。
　　其中最多人提到都係周凱旋話誠哥早喺２０２１年初，個個都沉醉緊喺魚缸三萬點嘅美夢嘅
時候，就已經話當時係「山雨欲來風滿樓」，之後經濟將「一落千丈」。的確，之後恒指唔係「
有啲差」，而係由３００００以上直殺到落去２０２２年１０月最低１４５９７，足足唔見一半
有多。誠哥當時建議佢嘅投資組合入面嘅企業應該準備多啲備用現金，當時有八成佢投資嘅公司
有聽講，「結果救咗佢哋一命」，唔聽講嘅就已經被調低估值。
　　對於而家每日１０００億成交額都無嘅魚缸，周凱旋就表示誠哥都仲係好留意魚缸，提到而
家去講魚缸單日嘅高低係無乜意義，最重要係唔好「ｇｅｔ　ｓｔｕｃｋ」，好多人直譯「
ｇｅｔ　ｓｔｕｃｋ」做「被套牢」，簡單來講就係轉牛角尖走入死胡同。對於魚缸係咪「
ｇｅｔ　ｓｔｕｃｋ」呢，周凱旋無講明，不過就提到如果唔係「ｓｔｕｃｋ」咗，就會係「
ｔｒａｎｓｉｅｎｃｅ」過渡期，咁就無所謂；但如果係「ｓｔｕｃｋ」，咁惡夢先啱啱開始。
　　周凱旋嘅回答問題技巧，就同誠哥一樣咁可圈可點，聽落好直白，但又可以有好多種解讀。
雖然目前孖屐普遍都覺得魚缸係「ｇｅｔ　ｓｔｕｃｋ」，但周凱旋就無承認或否認而家係咪「
ｇｅｔ　ｓｔｕｃｋ」，但就提供咗「ｇｅｔ　ｓｔｕｃｋ」同「唔ｇｅｔ　ｓｔｕｃｋ」嘅後
果，暗示目前嘅情況係應該何去何從，即係想唔「ｓｔｕｃｋ」就要將目前情況變成過渡期，即
係用方法去扭轉，否則情況只會比而家更差。
　　當然上面只係一種解讀，如果上述對後市嘅預測係一種智慧，咁周凱旋嘅回答技巧就更加係
智慧中嘅智慧，講出來大方得體唔得罪人，正反兩面都啱聽，比起一句「國際金融中心遺址」來
得更為有建設性，請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。