《小傳日記》魚缸今日再度挑戰250天線失利!今朝開高過250天線,但係一番爭持之
後都係企唔穩,最後都係要跌市收場,仲試過要跌300幾點,大市成交得800億銀多啲,氣
氛真係麻麻。
不過魚缸有魚缸慘淡,美團(03690)攻港氣勢如虹就相當熱鬧!有內媒報道,
KeeTa噚日新張開幕,有員工就透露,由朝早8點至夜晚8點12個鐘內,單係旺角至大角
咀嘅落單就已經最少有1500單,據講係符合美團方面預期,好有可能下個月開始就可以擴展
至旺角以外嘅地方。
大和率先研究KeeTa,同好多記者行家都自己嗌外賣嚟實測KeeTa,用三個外賣
App買同一碗魚蛋粉,分別用咗86銀(KeeTa)、92﹒2銀(Deliveroo)
同93﹒6銀(Foodpanda),價錢高低都係因為最低訂單收費唔同,當中KeeTa
係最平嘅。大和就話,KeeTa有價格優勢,估計市場短期會競爭加劇。同時大和又話,
KeeTa做本地市場有望成為美團拓展東南亞市場的「首部曲」。
除咗大和幫手唱好之外,美團一早就三軍未動,「種草」先行!早於噚日KeeTa正式上
線前,外賣員專用App「KeeTa Rider」已經有定一堆五星好評,App
Store上面大讚KeeTa Rider嘅好評堪稱泛濫,主要都係大讚KeeTa福利有
幾好,時間有幾彈性等等。有人統計過,新入職步兵一個月做滿500張單,加埋所有獎賞,月
入可以有成20000銀!騎兵一個月最多仲可以有成35000銀!就咁睇落就相當吸引,不
過好唔好做就等睇之後有無員工爆料啦。
過兩日就係美團放榜,雖然香港市場利潤最快都要等到8月份中期績先睇到,不過都可以期
待吓過兩日份績會唔會公布呢幾日嘅初步反應係點啦,請請!
*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文
只供參考之用,並不構成要約、招攬或邀請、誘使、任何不論種類或形式之申述或訂立任何建議
及推薦,讀者務請運用個人獨立思考能力自行作出投資決定,如因相關建議招致損失,概與《經
濟通》、編者及作者無關。
【你點睇?】新一份預算案公布,多項開源節流措施推出,你認為哪一項措施最能達致改善政府財赤目標?► 立即投票