《財經人語》陳德霖帶隊參觀印鈔廠，保安嚴密插翼難飛

　　美國日日「印銀紙」就聽得多，但係其實香港有個地方都係日日印，今年印刷量更加係４﹒０８億張，而且近五年嘅印刷量更加增加咗３８％，講緊嘅係大埔嘅香港印鈔公司
。
　　呢個廠房平時唔會對外開放，今日就由金管局總裁陳德霖帶隊，小記有幸入去參觀一下。廠房嘅保安嚴密，除咗想像到嘅鋼閘、２４小時閉路電視、同埋保安外，出入更加要經過兩重大閘
，同埋搜身，就算陳總出入都無例外架，而且唔可以帶任何私人物品出入。
　　廠房佔地只有７４６０平方米，工人約１１０人，但而家市面流通緊嘅３１００億港元鈔票
，大部分都係出自呢間廠，只有１０元鈔票因為生產線不足而外判。
　　間廠自負盈虧，由金管局持有５５％股權，中國印鈔持有１５％、三間發鈔銀行各持有
１０％。鈔票版模成本由各發鈔銀行負責，至於印鈔成本就由金管局負責。陳總話，主要因為銀行發鈔嗰陣，已經須免息向金管局提供等量美元，而呢批美元金管局係可以使用，所以由金管局負責成本都合理。佢又話，每張鈔票的成本只係７毫子。
　　廠長阮志才話，而家生產線其實已經接近頂峰，廠房內無位擴充生產線，所以要加印都只能靠員工加班同埋輪班制。他又話，印鈔廠要請人並唔易，因為每位員工都起碼要訓練兩三年先可以擔正，因為佢地要負責鈔票每個工序嘅正常運作，同埋要確保無偏差，如果唔係就好大件事嘞
！
　
＊一張鈔票，五次印刷，十五次質量檢測＊
　
　　印銀紙唔係話求其搵部影印機禁個ｃｏｐｙ掣就完成，今次陳總帶隊，就係帶小記們逐步拆解一張鈔票嘅生產之謎。
　　唔講唔知，原來每張鈔票都要經過五次印刷１５次質量檢查，先可以有層次分明的效果，同埋唔易仿製，包括膠版印刷、絲網印刷、凹版印刷和號碼及螢光條碼印刷，再由機器自動裁切，小張檢查和包裝。
　　目前流通的２０１０年版鈔票，更加有八種防偽特徵，除咗有紫外光燈下才可見到嘅熒光透視圖案，更加有肉眼可見嘅動感變色圖案和凹凸手感等等，令市民更加容易分辨真偽。
　　雖然上年有千元偽鈔出現，不過其實而家香港流通緊嘅偽鈔量是全球最少，每百萬張鈔票中只有少於一張，其次為澳洲，是１５張，而英磅歐元仲分別是１４０張和４８張。
　　題外話，廠長話，匯豐１５０周年紀念鈔都係係到印，仲話舊年已經印好。