有時候上討論區睇美國減息的話，應該係全城慶祝嘅事，因為樓市股市應該可以Gogogo啦？但對於環球股市，特別係亞洲市場，就已經嚇慘死，隔晚華爾街股市大跌五百點，因為投資者憂慮球經濟增速放緩，而經濟要軟著陸，到時先係恐怖開始。
其實半年前已經有唔少呼聲，要美國提早開始減息，因為當經濟陷入衰退時後再減息已經太遲；事實上，有唔少跡象睇到美國股市嘅大孖沙開始撤退，先係特斯拉股價下跌，然後NVDA股價破頂後下挫，加上巴菲特減持蘋果股票，呢堆科技股都已經係息口敏感股，如果利率有任何浮動，呢堆股票都會跟住走，不過而家跡象顯示，似乎係向下走。
野村證券的定量策略師Yoshitaka Suda表示，今日日本股市有大量投資者沽空，特別係期貨市場；而宏觀對衝基金做空日本股票的規模令人震驚。宏觀對衝基金在淨賣出日本股票和淨買入美國股票，佢認為日本同歐美貨幣策略上出現分歧而導致呢個情況，而日圓升值令呢輪拋售加劇。
有分析預計，投機者可能還會再賣出2萬億日圓（約合134億美元）的股票，即係話跌幅可能仲未完。
雖然鮑威爾又放晒風，話9月會開始討論減息問題，但佢都係講：「當月減息可能是一個選項」，係人都知道鮑叔最喜歡係出口術，由3月話減息到6月，6月個轉都唔減，咁9月減唔減？我就唔會咁老定啦，因為減定唔減，其實都會出事，如果唔減，美國經濟繼續差落去；如果減息，通脹問題又可能再來過。
即係話，減唔減，都係死，只係睇下邊個無咁傷囉。
*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。
【你點睇】有健身中心宣布全線暫時結業，議員指巨額預繳式長約並不合理，你日後若「入會」會更留意邊方面？► 立即投票
