《魚缸博客》黑芝麻智能（０２５３３）昨日公布中期業績，半年虧轉盈賺１１億人幣，而
舊年同期蝕３７億人幣。不過期內收入只得１﹒８億人幣，升６９﹒２％，毛利９００７萬人幣
，升３﹒６倍，經調整虧損擴至６億人幣，純利主因是金融工具公允價值變動淨額所致。不過業
績公布後，股價大幅反彈，昨日收升１２％，今早股價繼續抽升，最高升過２１％，高見
２７﹒８０銀，中午收市升１７％，報２６﹒９５銀。
黑芝麻智能今個月月初招股，獲得２﹒５倍認購，每手中簽率百分百。黑芝麻上市價２８銀
，８號掛牌當日股價潛水，收市價比上市價跌２７％，以每手１００股計，唔計手續費都要蝕成
八舊水。股價之後亦唔見起色，喺２０銀附近浮浮沉沉，直至噚日，藉著中期績大反攻。相信一
大批蟹民最興奮，眼見都嚟返家鄉，唔知聽日有無機會繼續上？
黑芝麻智能成立於２０１６年，公司專注於開發集成了ＣＰＵ和內存等自動駕駛汽車關鍵部
件的系統級晶片（ＳｏＣ）產品。公司供應兩個系列產品：華山系列和最近推出嘅武當系列
ＳｏＣ，直接為汽車供應商和汽車製造商提供服務。黑芝麻智能嘅ＳｏＣ主要用於高級駕駛輔助
系統（ＡＤＡＳ），屬於自動駕駛等級中嘅３級，呢個等級中的０級表示無自動駕駛，５級表示
完全自動駕駛。３級仍需要駕駛員在場並隨時準備接手。
不過，汽車製造商越來越多自己開發晶片，可能會降低對外部合作夥伴嘅依賴。據內媒報道
，蔚來、理想汽車和小鵬汽車最近都加大了晶片研發投資，此舉可能會導致獨立晶片供應商嘅市
場萎縮。所以，黑芝麻智能要短期內取得真正盈利仍然困難重重。今次藉著公允值變動，股價大
幅炒高，仲有幾多空間可以炒？有無機會見家鄉？博客有啲擔心。如果可以返家鄉，俾博客一定
走為上策。當然，如果你一心想做鐵粉，就要有Ｄ耐性，初創企業收成期可能要好耐！
《編者按》本欄搜羅即市傳聞，惟消息未經證實，《經濟通》亦不保證內容之準確性。
《說說心理話》運動員強大心理質素如何煉成？張小倫分享最挫敗經歷，及後怎樣重整旗鼓？► 即睇
