以為上個禮拜尾亞股已經叫做大跌,點知今日先係「沒有最深,只有更深」,日韓台股市今日出現更加慘烈災情,台股同韓股都暴跌超過8%收場,日經係三地之中最慘烈,全日最多跌過15%,收市跌大約12.4%,大幅蒸發4451點,收報31458,超過半年以來首次跌穿32000大關。
今趟亞洲股災「震央」主要位於日本,日經今日創下最大單日點數下跌紀錄。日經早喺上個禮拜四(1號)已經出現暗湧,正當大家都睇緊美國要準備減息,偏偏日本就掉轉頭放鷹。上個禮拜起,已經有唔少日本專家預期日本將會喺今內再次加息,最快可能會喺10月,消息傳出之後日經就跌足兩日,累跌3192點。
再到今日,日本央行6月會議紀錄出爐,9個委員入面至少兩個贊成提前加息,而全部委員更加一致覺得,疲弱日円係導致高通脹嘅主因,有委員直接表示,有企業比以前更加積極將成本上漲轉嫁消費市場。呢一份咁鷹嘅會議紀錄完全令孖屐信服日円大有機會一飛衝天,亦都坐實上個禮拜嘅預測,想唔信都唔得,於是日經今日就放量大跌。
以走勢嚟睇,日經今次升浪已經維持咗年半,雖然中間試過調整,但都唔及今次堅跌。以周線嚟睇,已經連跌超過三星期,至今累跌9732點,即係差唔多成萬點,四個星期未夠就蒸發過去大半年嘅升幅。不過,日經上年10月喺30500造咗個雙底支持,今日暴跌都總算未跌穿呢個位,暫時可以憧憬30000係支持位,不過支唔支持得住就要再睇日本央行會唔會口頭鬆一鬆,如果唔係,直穿30000試28000都不遠矣,請請!
*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。
《說說心理話》運動員強大心理質素如何煉成?張小倫分享最挫敗經歷,及後怎樣重整旗鼓?► 即睇