今日係中秋節前夕，但魚缸靜到冰點以下，今日成交竟然唔過500億，雖然係觀望減息兼無北水，但呢個數實在係令人心酸。雖則魚缸咁靜，但香江一啲都唔靜，皆因「疑似」騙徒處處，呃你簽長約做gym又可以氹你買假月餅，花生料天天都多。
上星期海關就拉咗舒適堡創辦人夫婦，涉嫌違反《商品說明條例》入面嘅「不當地接受付款罪」。好在目前舒適堡灣仔分店由「Healthy」接手重開，目前坊間對於「被騙」嘅感覺都唔算好高，而目前都未有起訴創辦人夫婦任何有關「詐騙」嘅罪。
舒適堡未涉騙，但賣一家喺香港聞所未聞嘅香港月餅呢，騙味就多得多喇。近期神州網紅主播「瘋狂小楊哥」直播賣「香港美誠月餅」，但本地網民表示「而我不知道美誠是誰」之後，上面網民先開始挖出原來「香港美誠月餅」全程內地生產，喺香港只有一個註冊地址，更加係由N間公司合租一個地址。事件已經驚動廣州市花都區市監局，當表示會針對「香港美誠月餅」營運商廣州市美誠食品進行核查，而小楊哥嘅帶貨公司係屬於唔同地方，需要協調各地監管部門先可以同時處理。
今次最出事就係小楊哥喺直播講明美誠係嚟自香港，又話「兩分鐘時間賣出了2.4萬單」，旗下又有主播吹水話美誠「已經做了20多年了」，根本就句句都假。最花生之處今次「疑似」假香港月餅又涉及TVB(00511)總經理曾志偉，繼之前被翻出同緬甸電騙頭目白應蒼賀壽，又捲入今次涉騙事件。
上個月底小楊哥兄弟嘅「三隻羊」就宣布喺香港開設分公司，8月21號就喺尖沙咀舉行開幕禮。小楊哥之前就喺直播曾經講明「曾志偉是我們香港分公司的老闆」，三隻羊創辦人之一盧文慶都曾經透露分公司將會有一位關鍵合夥人加盟。開幕禮前兩日曾志偉都有喺個人抖音號為三隻羊造勢。到開幕禮當日除咗曾志偉現身之外，現場都星光熠熠，此後各大傳媒都有報道曾志偉就係三隻羊香港分公司老闆。
曾志偉曾經都有喺小楊哥直播期間幫手賣「香港美誠月餅」，仲提到「這個送禮是非常好」。曾志偉唔係第一次賣月餅，更加廣為人知嘅應該係佢幫真正本地薑嘅奇華月餅做咗超過廿年嘅代言人，今年應該已經無再做先可以轉去直播賣「香港美誠月餅」吧。但以佢做咗月餅界代言人咁多年，應該無理由唔知邊啲先係本地品牌，但都照為「香港美誠月餅」呢個「新晉」品牌站台，事情搞到咁大，連神州官媒都加多兩嘴，難免都好影響佢個人公信力，下次如果又見到佢站台其他產品，都唔知信唔信好，請請！
*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。
【與拍賣官看藝術】常玉作品屢創天價，背後其實藏著跌宕起伏的人生► 即睇
41,622.08
17,592.13
