中國家電龍頭美的集團(00300)(深:000333)，千呼萬喚終於喺香港啟動招股，招股價介乎52至54.8銀，較上星期五（6日）其A股收市價（63.02人仔）折讓兩成至兩成半，折讓幅度較市場預期多。美的集團一手100股，入場費5535銀，以上限價計集資最多近270億銀，順理成章成為本港今年新股集資王，兼三年來最大型新股。
只可惜，招股反應雷聲大雨點小！美的集團首日（9日）開始公開招股，只得2.65億銀孖展認購，尚未足額。截至招股第二日（10日）反應依然慢熱，綜合多間券商數據，暫只錄得約5.9億銀孖展，佔公開發售44%，仲係未獲足額認購。不過，國際配售部分已獲足額認購，難怪有底氣放話要以上限定價。
呢邊H股招股反應一般，嗰邊A股股價就跌唔停。由9月4日最高66.7人仔，跌到噚日（10日）收市得60.75人仔，累跌9%。究竟係因為知道H股有兩成折讓，搞到A股要跌返夠本，實行拉近距離？定係見你A股係咁跌，變相折讓縮水，搞到H股少咗人去認購？真係唔知邊個累邊個，或者呢啲就叫累鬥累。
可能知道A股股價連續下跌會影響H股認購氣氛。美的A股今日忽然神勇，升0.91人仔，收報61.66人仔，但整體A仔場氣氛仲係低迷，上證指數上星期先跌穿2800點大關，今日仲一度低見2710，試問美的又點可以獨善其身？
講番美的折讓招股，學啲股評家話齋，好多H股比起A股都有折讓啦，呢D都唔係乜嘢新鮮事，就以中石油(00857)為例，今日H股比起A股都有三成幾折讓啦，有咩出奇啫。
除咗折讓價唔夠誠意之外，內需疲弱亦都影響投資者對美的嘅期待。事關呢兩年內地經濟增長放緩，消費降級，加上房市不振，大家都擔心對家電嘅需求減少。雖然早排中央推出「以舊換新」政策，不過主要流於口惠，對家電股股價提振都係曇花一現！
雖然認購反應唔理想，但只要美的喺中秋節（17日）掛牌首日盡力谷，等股價升返多少，俾撐場嘅投資者執番啲就已足夠，認購超額幾多倍真係唔緊要，股票有錢賺永遠先至最重要！請請！
*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。
【你點睇】當局擬放寬九龍東商業區土地用途，有議員認為應推廣至全港都開放些少，你是否認同？► 立即投票
40,707.95
5,522.29
