按盤價 
《魚缸博客》雖然香港農曆新年假已過，但內地仲有幾日，呢個農曆年假，有唔少內地遊客
去咗海南島，搞到周圍人山人海。近日有內媒報道指，唔少喺海南三亞度歲嘅旅客因無提前買回
程機票而面對「出島難」嘅問題，從三亞飛內地多個主要城市嘅機票價格明顯貴咗，而且經濟艙
基本上無餘票，僅剩價格成萬蚊人仔嘅商務機票。有網民就喺社交平台教人「曲線回家攻略」，
建議買三亞飛國內城市如上海、北京再轉機飛南韓首爾嘅中轉航班，全程商務艙只需三千多元，
雖然後來加價去到４０００元，比三亞直飛上海仲要平，「在國內第一段航程結束就下飛機，至
少可以節約幾千元」。
呢條橋其實唔算新，筆者曾經都用過。除此之外，仲有另一個奇特嘅現象，你係香港買嘅來
回機票有可能比在外國買嘅來回機票貴，於是又產生另一種對策。Ｎ年前，筆者前往歐洲某城，
需要住一段時間，入境時當然必備來回機票啦，而且機票係一年有效，兼且可以隨時更改日子嘅
。
幾個月後，筆者有事要返香港，原本準備用手上嘅回程機票。但係當地嘅旅行社準備改期時
先發覺，原來從歐洲出發飛香港嘅來回機票，比有香港出發嘅來回機票平一大截。於是筆者靈機
一觸，從新買過一張來回機票，從歐洲出發返香港。而原本嘅回程票反正一年有效，等筆者一年
後返港再用。假如中間多次來回，節省嘅錢仲多。所以，今時今日要做一個精明嘅消費者，真係
要多了解下行情。當然，上述嘅做法現在仲行唔行得通筆者唔清楚，畢竟呢幾年出遊嘅機會少。
講開機票，舊年復常後，幾隻航空股不升反跌，反映內地經濟復甦不似乎預期，但跌成咁又
有啲過分。以南航（０１０５５）為例，股價甚至跌到疫情爆發後嘅低位，有啲跌過龍。不妨多
關注關注，龍年股價就算唔大升，但可跌嘅空間亦唔多。（ｖｓ）
《編者按》本欄搜羅即市傳聞，惟消息未經證實，《經濟通》亦不保證內容之準確性。
【你點睇】巴黎奧運正式閉幕，今屆你感到最深刻的地方是？► 立即投票
