《小傳日記》魚缸靜到飛起，連埋今日啱啱好成個禮拜日日都唔夠１０００億銀成交，升得
４月至５月嗰轉，又返到去清淡如水嘅市況。唔想飲水不睇吓啲茶，但是啲「茶」都一樣無眼睇
。
目前魚缸有兩隻茶飲股，奈雪（０２１５０）同茶百道（０２５５５）。雖然上市時間有先
後，但走勢都一樣－從來無升過！茶百道今年４月上市，上市價１７﹒５銀，一開即破發至今從
來沒有升幅，目前喺６蚊邊吊命。奈雪更加唔客氣，上市三年有多，上市價１９﹒８銀，除咗
２０２２年底至２０２３年初炒復甦升過少少，然後一直沉底，近三個月都近乎每周創新低，今
日再創新低見１﹒３２銀，距離毫股不遠矣！
睇見咁嘅境況，據講本身爭住做「過缸龍」嘅茶飲行家都縮沙，原本最大聲勢嘅蜜雪冰城年
初被上面證監會「追問」之後一路都無聲氣，如今睇嚟都算係塞翁失馬。魚缸５月後就已經升勢
受阻，隨後嘅ＩＰＯ都失色唔少，到今季都已經少咗好多ＩＰＯ。尤其茶飲就更加係，兩隻「前
車」跌成咁，其餘同行好似古茗、滬上阿姨等都都唔會呢個時勢走嚟「跟跌」啦！
茶飲撈唔掂當然同消費市道唔好有關，基本上同質性高，好難有一間特別突出，玩名牌效應
賣特許經營嘅蜜雪都已經難得地係靠呢招跑出，其餘根本都只可以喺市道唔好呢個泥潭入面捱世
界。
茶百道同奈雪都已經發盈警，前者中期賺少６３％，後者更加中期再度轉蝕最少１﹒２億人
仔，但面對係咁都未見到佢哋推出有效嘅自救方案，即係面對市道唔好佢哋根本就只有捱。長貧
難顧，奈雪第二季淨新增直營門店數目歸零，可以話已經陷入靜止狀態，亦都未見到有再公布融
資信息，所以可能真係得返個「等」字。
息係真係就嚟減，但減完息對神州市道又係咪立杆見影，一眾茶飲股都只可以啞仔食黃連，
請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
【與拍賣官看藝術】常玉作品屢創天價，背後其實藏著跌宕起伏的人生► 即睇
