《魚缸博客》今日個市悶悶地，對住呢種悶市真係好易恰眼瞓。不過，亦都係呢啲悶市，容
易見到細價股有炒作。今日領跑嘅細價股繼續係冠轈控股（０１８７２），隻股昨日已經升過嚟
。昨日股價一度飆升１﹒６倍，尾段雖然升少咗，但收市仍升７４％。冠轈今早再次發力，最高
飆升５５％去到９毫半，成交金額暫時都係兩球幾。用兩球幾銀就可以將市值由６千幾萬炒到接
近一億銀市值，計落有著數。
冠轈控股主要喺新加坡從事銷售新平行進口汽車及二手車；提供汽車融資服務；汽車保險代
理服務；銷售汽車零配件，及汽車租賃服務，生意算係正正常常。
舊年集團營業額微增１％至１﹒８１億元坡紙，股東應佔溢利大升５４﹒３％至７７５萬坡
紙。仲要係自２０１９年起，年年有錢賺。
而家集團市值得嗰１億銀都唔夠，真係有啲偏低。以舊年賺７７５萬坡紙計，圍返成４千幾
萬港紙，市盈率得２倍左右，又真係低咗啲。所以，股價就算炒上１蚊都仲係抵買。只不過咁，
冠轈控股５月底實行股份十合一，變相２０１９年最高股價折合去到成５０蚊，而家得幾毫紙，
博客見到股價落差咁大，又或者見到供股合股咁情況出現，難免有啲戒心。所以，呢啲股亦都唔
敢比目標價。想短炒嘅投資者，只要唔太貪，細細地玩吓無妨，長揸就要認真考慮清楚先好。
（ｖｓ）
《編者按》本欄搜羅即市傳聞，惟消息未經證實，《經濟通》亦不保證內容之準確性。
【與拍賣官看藝術】常玉作品屢創天價，背後其實藏著跌宕起伏的人生► 即睇
