本地地產市道唔好唔係第一日知,但新世界(00017)嘅重磅盈警都著實係嚇窒孖屐,乜原來真係有咁差。
新世界預計截至6月底全年大蝕190億至200億銀,但其實呢個數係包咗好多一次性因素,包括大量非現金重估以及出售事項確認虧損以至係撥備等等。雖然上述巨額虧損只不過係帳面上嘅,不過資產貶值相當於負債比率高咗,未來要借錢難咗,而且之後仲有無得派息都好難講。
而單計持續經營業務,就仲可以錄得核心經營溢利介乎65億至69億銀,不過都係比2023年要少大約兩成,衰就一定衰硬,但究竟衰到咩程度就有得斟酌。
新世界過去好一段都被睇淡,主要原因都係因為仍負債比率高過同行,就算呢幾年新世界一路想證明就算負債高,都可以用成績補救,但始終搞唔靚盤數,結果就係不斷捱沽。近呢幾年新世界二代話事人純官鄭家純都開始放手畀第三代,尤其新世界執行副主席兼CEO鄭志剛,孖屐普遍認為已經等同已經等同欽定咗繼任人。而Adrian揸旗開始,新世界風都開始唔同,旗下商場同商廈都變到香噴噴,而且設計感十足,變成新世界嘅嘜頭。但呢種新派設計就未能為新世界嘅業績出一分力,孖屐普遍認為呢種升級就係新世界盈利能力下降嘅一大主因。
就係咁,純官都疑似開始有意唔想「單天保至尊」,雖然過去自己可以獨力撐起半邊天,但新一代四個仔女都疑似未有人可以一枝獨秀。所以新世界除咗發布盈警,鄭氏家族錢袋周大福企業就宣布成立行政總裁辦公室,成員包括純官孻仔鄭志亮,但就無包括Adrian在內,市場普遍揣測係純官想捧埋孻仔上位,等四個仔女平分秋色,大家咁高咁大齊齊「猜皇帝」。
大家咁高咁大,自然要各自爭表現。以往幾年新世界明顯由Adrian主導,如今變陣之後明顯係各有各嘅發揮空間。雖然話係爭凳仔,但如今嘅新世界,確係需要一啲新動力,有得爭有碰撞就自然有火花,可能啲一點火花就係再次撻著新世界嘅火力。星星之火可以燎原,純官呢把火都點得相當令人期待,請請!
*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。
【你點睇】國家隊奧運健兒訪港,有市民指難以購票感到遺憾► 立即投票