《小傳日記》阿爺公布咗2月通脹好過預期少少,魚缸今個禮拜已經忍唔住借勢連炒兩日,
睇來缸友真係餓咗好耐,一有啲料就嚟個猛火快炒,今日大市造足近1500億成交,都相當有
交代。
今日都算係消費零售板塊爭返啖氣嘅一日,小米(01810)官宣SU7今年個月底交車
,海底撈(06862)有花旗護航大升盈測,分別升超過一成一同一成三,而板塊入面仲出咗
隻李寧(02331)最多試過升超過兩成,但係最終就只係升8%。
本身今朝都係跟市升,但下晝忽然傳出,李寧本人正打算收購李寧!下畫開市之後,《路透
》引述四個知情人士報道,李寧正考慮私有化同佢同名嘅運動服飾公司。李寧公司當時就回應提
到尚未收到任何有關此事的信息,而李寧方面就暫未回應。消息之後李寧股價一度急升兩成,仲
試過觸發市調。
到今日收市,暫時李寧公司都未有更新回應。不過《路透》報道仲提到,「李寧」(唔知公
司定本人)認為股價被低估,所以有可能收購價會比現價大幅溢價,目前已經同多個大型基金密
斟籌旗。
李寧畀孖屐downgrade,近期最著名當然就係北角買樓事件,上年底使22億銀同
恒地(00012)買起北角港匯東全幢嚟做總部,買樓還買樓,仲要用「公司內部資源」畀錢
,即刻被孖屐覺得佢大花筒,仲要喺個個都未敢入市嗰陣高調撈底,震驚魚缸。就算唔講呢個單
一事件,李寧同安踏(02020)基本面上都一直受困於高存貨量嘅問題,變現能力低,係一
路拖累著股價嘅主要原因。
上個月CPI好返啲,如果今年神州市道真係繼續朝住呢個方向,李寧都算係趁低位嚟私有
化。「李寧」覺得股價被低估,可以係睇好後市,亦可以係覺得公司運作上應該可以跑贏大市,
但以之前撈底港樓嚟睇,李寧本人可能真係大好友都未定。
但更重要係,李寧下個禮拜出業績,仲有大約一星期傳啲咁嘅料,今日仲挾最多兩成升幅再
落返嚟,整體都好「巧合」,呢啲時候想入場炒私有化真係要小心,請請!
*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文
只供參考之用,並不構成要約、招攬或邀請、誘使、任何不論種類或形式之申述或訂立任何建議
及推薦,讀者務請運用個人獨立思考能力自行作出投資決定,如因相關建議招致損失,概與《經
濟通》、編者及作者無關。
【你點睇】工聯會調查指外勞輸入政策影響漸現,多個行業失業比例較高,促暫停輸入外勞,你是否認同?► 立即投票