按盤價 
《小傳日記》萬眾期待嘅「筆直」終於推出！由諮詢到今日，成份預算案就係等阿財爺開口
講一句，結果唔只減辣，仲係全面撤辣，一次過變成清湯！財爺一聲令下，魚缸即刻轉跌為升，
唔只減仲係全撤，低位計即刻升咗２００幾點。
今朝１１點讀預算案前，魚缸已經有錢偷步炒本地地產股，等到１１點，魚缸一路等就一路
沽，仲唔講又沽啲，唔講又再掟咁啲，搞到地產股一度轉跌。不過到１１點２０分，一講到「額
外印花稅、買家印花稅、新住宅印花稅」三辣齊撤，地產股就即刻倒升，其中新世界
（０００１７）就最強，全日最多升過９％！
但係等到午市，財爺終於讀完，但係魚缸就開始反面，升幅收窄再轉跌，最終要跌２００幾
點，差唔多ｄａｙ ｌｏｗ收市！其實睇返成份「筆直」，除咗等了又等嘅「撤辣」登場，就好
似無乜糖派，最多係利得稅同薪俸稅減免同差餉減免，再加埋人仔櫃台可能納入港股通，之後都
無乜重點，計落只可以算係派咗糖霜！
反觀更加令人擔心就係財爺唔只糖派得少，仲調轉頭問你借糖。財爺話，政府計劃未來五年
入面，每年都會發債籌９５０億至１３５０億銀，用以推動北部都會區等等項目，但係「明日大
嶼」就未必包括在內，所以財爺就話會繼續研究，亦都講名次序會後於北都。雖然政府就話係見
之前綠債銀債三跑債大家咁捧場先再出，但大舉發債亦都有唔夠錢使嘅意味，所以講明「明日大
嶼」發展次序較後，咁就可能會「明日復明日」，慳著使先算。
孖屐睇清呢一點，所以魚缸下晝都ｋｅｅｐ住捱沽，地產股都散水味濃。對於缸邊友來講，
穩陣派嘅最大消息就係趁減息前抽多兩手ｂｏｎｄ囉，反正政府債都穩陣，當係響應財爺呼籲參
與吓香江基建，請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
《說說心理話》【奧運劍擊熱】大師兄張小倫親身分享！贏在起跑線=壓力？如何培育子女有卓越成就？► 即睇
