《小傳日記》東方甄選(01797)爭凳仔大龍鳳落畫之後,老闆俞敏洪親自為董宇輝搭
個新舞台,為佢開一條新channel,日前channel正式命名為「與輝同行」,噚晚
仲敲鑼開咗新台第一場直播,一睇條數,就知東方甄選點解離唔開董宇輝。
噚晚七點與輝同行剪綵開播,期間除咗董宇輝之外,仲有旗下團隊嘅七位主播輪流做才藝表
演,包括唱吓中英文歌、詩詞朗誦、鋼琴表演以及係中英文化對談等等。今次係旗下主播團隊第
一次亮相,董宇輝就話想用今次首播機會,令大家記住與輝同行嘅每一個年輕人,都係同佢一樣
咁勤奮、有天賦同努力。之後董宇輝又發揮文采金句本色,話呢個直播間希望帶畀大家「不只生
活中的美好細節或柴米油鹽醬醋茶,也希望能夠讓大家靈魂飄向遠方,能夠從日常的瑣碎中抽離
出,體會一些美感」,真係夠曬冧。
言歸正傳,有直播就唔可以唔帶貨,之後董宇輝開賣大量過年必備食品,例如大白兔糖、核
桃、雪花肥牛、果仁禮盒同遼參小米粥等等,不過全部都係出面牌子,無一樣係東方甄選自營產
品。
埋單計數與輝同行直播第一戰成續彪炳,七點開播前粉絲人數大約417萬,落播之後粉絲
人數大增到差唔多709萬,開播唔夠四個鐘內漲粉差唔多300萬,足證董宇輝人氣真係唔係
講玩。睇GMV更加強勁,一晚就已經做夠1億人仔,成晚累計有5431萬人次觀看。相反東
方甄選無咗董宇輝之後明顯無咗半條命;同樣係噚晚,東方甄選GMV只有大約1000萬至
2500萬人仔,計到盡都只係得與輝同行四分之一,只有1545萬觀看人次,明顯被比下去
。
由此可見,董宇輝事實上係功高蓋主,難怪前CEO孫東旭一直被指有意無意打壓董宇輝。
孫東旭判斷係錯唔曬,但係當佢哋發現嗰陣已經為時已晚,董宇輝已經羽翼長成,已經唔係孫東
旭可以壓得住。如今與輝同行仲係東方甄選旗下,如果有一日董宇輝真係離巢,東方甄選就會變
成跛腳鴨,所以東方甄選當務之急既要留住董宇輝,亦要為自營台再建立返一個收入主力,絕對
係一場硬仗,請請!
*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文
只供參考之用,並不構成要約、招攬或邀請、誘使、任何不論種類或形式之申述或訂立任何建議
及推薦,讀者務請運用個人獨立思考能力自行作出投資決定,如因相關建議招致損失,概與《經
濟通》、編者及作者無關。
【慎防受騙】偽冒《經濟通》投資群組頻現,切勿誤信騙徒,如有疑問,請循官方渠道查詢► 了解詳情