按盤價 
《小傳日記》Ａ場上演「大奇跡日」，原本上證綜指今朝仲要跌多２％，結果尾市「顯靈」
，傳聞話國家隊再度喺尾市進場瘋狂掃貨，好幾個板塊單日轉向拉升，結果倒升之餘同時收復
２８００，如果魚缸都有「政府隊」你話幾好呢？
就算未有「政府隊」，魚缸今日都迎來新年第二升，全日爭氣升１１４點。爭氣嘅今日有唔
少股都拗升，好似隻福萊特玻璃（０６８６５）今日就飆超過６％，升穿百天線，走勢都相當之
靚。光伏都曾經係熱炒概念，「碳達峰碳中和」之外唔少公司都想撈一浸。不過市道轉差之後，
就發現轉型需時，短期內要谷經濟，慳水慳力平靚正都係要用返化石能源，所以呢兩年啲光伏概
念股都吊曬車尾，反而煤炭股就連續兩年跑贏大市。
福萊特今日爭氣升，福萊特Ａ（滬：６０１８６５）都跟升，睇睇吓仲發現咗隻福萊蒽特
（滬：６０５５６６）。係福萊「蒽」特唔係福萊「蔥」特，係「艹」頭下面做個「恩」，本身
睇到仲以為係福萊特旗下一間公司，但原來係毫無關連。蒽本身係一種芳香揮發性化合物，經煤
焦油提煉出來，可以用來合成多隻化合物。而福萊蒽特本身係一間紡織染料生產商，主要生產耐
洗、耐曬嘅染料。
原本以為有報道搞亂咗福萊特同福萊蒽特，將福萊蒽特呢間染料商都當成係光伏概念，點知
福萊蒽特都真係有光伏概念。２０２２年開始，福萊蒽特就新成立子公司杭州福萊蒽特新能源有
限公司。當然唔係無啦啦轉做太陽能板，據公司２０２３年財報就話，福萊蒽特新能源嘅主要業
務為太陽能電池封裝膠膜業務，主要生產ＰＯＥ或者ＥＶＡ等等塑料造成嘅膠膜，用來封裝太陽
能電池，摱車邊都係光伏行業嘅一份子。睇返財報，２０２２年全年，福萊蒽特光電封裝材料業
務收入為大約１﹒５１億人仔，佔公司總收入接近一成半，但係分部毛利率只係得１﹒３％，反
映都仲係非常初步階段。
兩地股市都有唔少撞名股，好似美團（０３６９０）同美圖（０１３５７）就睇落好似，而
內房就有陽光１００（０２６０８）同Ａ股陽光城（除牌前深：０００６７１）。福萊蒽特做開
染料忽然撈過界做電池嘅封裝膠膜，仲要賺得唔多，但係逢講起光伏概念嗰陣，福萊蒽特同福萊
特都可以齊齊叫做光伏概念。股唔大，但黐得埋熱炒概念點都有著數，搵開福萊特都會睇到福萊
蒽特，請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
【你點睇】機管局獎勵航空公司增往來香港航線，措施能有效推動航空業復常？► 立即投票
