《魚缸博客》港股今日承接外圍股市造好,恒指暫時飆300幾點,成分股升多跌少,跌嘅
股份寥寥可數。喺細價股中,呢刻升幅最大係原生態牧業(01431),臨近上午休市前升約
27%,但成交金額得嗰30萬銀鬆啲。原生態牧場主要位於黑龍江、吉林等地,主要供應原奶
畀幾個奶製品生產商如蒙牛(02319)、伊利、飛鶴(06186)等。原生態牧業喺
2013年上市,上市價2﹒7銀,啱啱上市時股價升過1仙,見過2﹒71嘅「歷史高位」之
外,其餘時間股價都未曾返過家鄉。以現價1毫1仙半計,上市11年來股價唔見咗95﹒7%
。市值高峰期有過百億銀,到而家就只得5﹒4億銀。
點解表現咁差?睇番集團過去幾年業績。自2019年至2023年呢5年間,無論係營收
,定係毛利都年年增長。純利方面,除咗2023年因為公平值變動而導致虧損超過3億人仔之
外,其餘年年都有錢賺。其中2020年純利更高達5﹒7億人仔,高過集團現時總市值。不過
,就算嗰年賺咁多錢,但集團連1仙股息都無派過,難怪今時今日畀股民遺棄。
2020年,中國飛鶴收購原生態牧業股份,完成收購後,中國飛鶴持有集團權益增至
71﹒27%。中國飛鶴係內地其中一個規模較大奶製品生產商,亦係原生態牧業其中一個大客
戶。收購之後對原生態牧業應該產生協同效應,算是雙贏局面。所以,原生態牧業呢幾年營收增
長穩定可以理解。可惜嘅係,中國飛鶴入主原生態牧業後,並無改變原生態牧業固有嘅零派息政
策。即使2020年大賺5﹒5億人仔,依然一毛不拔。試問股民點會唔遺棄?奇怪嘅係,中國
飛鶴呢個阿媽自己就年年派息,就算舊年賺少三成,但息率依然維持7%。但就繼續唔畀阿仔派
息?
今日原生態牧業股價飆升只因發盈喜,預期中期轉賺最多1﹒5億人仔。即使發盈喜,但成
交金額跟唔上,睇來散戶已經心死。其實,要股價回升不外乎盈利年年升,仲要年年派息,最好
同阿媽(中國飛鶴)睇齊有7厘回報,同散戶分享公司成果。如果唔係,散戶寧願要乸唔要仔,
買中國飛鶴好過啦!(vs)
《編者按》本欄搜羅即市傳聞,惟消息未經證實,《經濟通》亦不保證內容之準確性。
【你點睇】教育局最新初中教材提出應堅拒婚前性行為,你認為教材內容是否不合時宜?► 立即投票