《Make Money》一萬蚊，點樣煲大好？進擊的你…GO！

　　政府派一萬蚊，大家最快喺21號父親節開始登記，7月8號袋袋平安！本來大家都打算拎呢一萬蚊去旅行去買電話去買PS5去買……咪住，去旅行？未得住；買嘢？就梗係開心啦，但有無諗過錢滾錢賺錢呢？唔好睇少呢一萬蚊，今集就同大家做個一萬蚊投資攻略！進擊的你，Go！

 (Shutterstock圖片)

抽新股最緊要識揀，「B仔」股有錢途?！

(iStock圖片)

　　點樣抽新股就唔再講啦，之前都教過大家點抽，詳情睇返「新手點抽新股？一文睇晒懶人包」。而近期新股市場，除咗手遊股之外，就當數生物科技股最有「錢途」。

　　　留意返，通常想抽呢類「b仔」股，入場費由6000幾至萬幾蚊不等，因為佢地市值都頗大，投資者有機會要貼多少少錢抽；而由於呢類股份未有盈利，所以都有一定程度風險，但近期Ｂ仔新股都幾旺盛，有機會賺多幾千蚊出部Switch啦！

六合彩7月15日重開，複式買小注碰運氣！

(Shutterstock圖片)

　　雖然疫情之下馬仔繼續跑，但係投注站又唔開，無電話投注都幾麻煩。不過最新消息，投注站喺本月22日重開；而七月中、即馬季休息時候，就到六合彩重開，一眾六合彩fans係咪已經手痕痕想畫飛仔呢？　

　　當然啦，我地唔係鼓勵賭博，不過買少少碰下運氣都好，更何況「六合彩惠澤社群」。六合彩頭獎好多時都係「半注中」呢？究竟點解有人會買半注？簡單Ｄ講，六合彩一注係10蚊，半注即係5蚊。一般我地買六個號碼嗰種叫「單式」，中獎機率為１４００萬分之一；但有一種叫「複式」買法，即係選7至49號碼串勻，買得愈多號碼，投注額就愈貴。

　　不過經常最多人買，就係買10個號碼嘅複式，串勻10個號碼就緒要買210注，如果10蚊一注就投資2100蚊，但多數人都係買半注5蚊，即合共1050蚊。近年來好多人中獎都係透過複式提高中獎機率，特別係類似「中秋金多寶」呢類獎金極高嘅日子，睇返紀錄，好多中獎者都係買複式為主！不過＝，小賭怡情，千萬唔好賭身家，唔係就「惠澤社群砸自己」啦！

Bitcoin有望重返萬元關，先開個電子銀包再講！

(Shutterstock圖片)

　　Bitcoin上年炒完一輪之後，最近似乎又有人再落鑊！疫情恐爆發第二波，而中美角力沒完沒了，４月時金、油、股、債齊齊向下，Bitcoin就成為了市場避險新寵兒，加上佢２４小時買賣，就算星期六日發生大事，都可以即時Trade in，成為投資者最愛！

　　買賣Bitcoin其實唔難，目前香港好多地方都Bitcoin嘅ATM，大家最緊要先喺部手機開返個電子貨幣專用銀包；其次就喺大型Bitcoin交易平台做開戶認證（因為好多平台都要身分證同地址證明，所以要搞好幾日），就可以自由上平台買賣啦！近排Bitcoin喺9000美金起開始反彈，有分析指因為近期地緣政治因素，有機會爬返上萬元關口。

　　提提大家，Bitcoin屬於較為波動嘅投資產品，所以要長期睇實，到位就要好食胡啦！

貼錢買心頭好，買隻撈當儲錢！

(Shutterstock圖片)

　　除咗一般投資產品，其實可以買下實體奢侈品，好多都有保值作用，例如男士們最愛名表「勞力士」。唔好以為佢地隻隻都十幾萬開頭，其實都有好多平民款，但就梗係唔止一萬蚊啦，有啲表款三幾萬都有交易，重點係名表會隨時間保值，又可以有個「行頭」，好過拎銀紙放銀行啦！

　　女士呢？都可以買返個包包啦，換季之餘又可以拎出去賣。除此之外，近年來喺古董界都有唔少平價新歡畀人投資，例如一種叫「文玩核桃」嘅東西，據說係清朝時後開始流行，其實就好似兩個波咁係手掌轉來轉去，不過搵到一對同款嘅就十分之難。「文玩核桃」平嘅一百幾十都有，貴嘅可能要十萬八萬，算係呢十幾年來比較流行嘅「新古玩」！

撰文：李皆穎

【etnet一App通天下】獨家「銀行匯率比較」功能：匯市靚價一眼通，一按直達交易商，買入賣出好輕鬆！

立即下載>>

etnet財經﹒生活App 

iOS : https://apple.co/2PCaN4b 

Android: http://bit.ly/38h135T

etnet MQ強化版App 

iOS : https://apple.co/2VEjoHl 

Android: http://bit.ly/32RGk7G

《說說心理話》 消費能獲取快樂？買不起，不如花光錢錢$$？「習得性無助」有何影響？一起看看正確理財觀念。► 即睇