【鼠年運程】蘇民峰:社會爭拗減,樓價勿看淡
27/12/2019
移民篇:揀移民邊國要睇運程 睇完大運睇流年運
本港政局不穩,移民又再成為親朋相聚的熱門話題,蘇民峰也表示今年特別多顧客詢問移民的話題,「尤其有仔女嘅,個個都問」。很多人問師傅,究竟自己是否適合移民,蘇民峰從玄學角度指出,「移民唔係講適唔適合,移民係跟個人大運,原來每一個人移民會有不同方向,其實係無得揀,如果去唔啱方向,佢唔會留喺度,好快會走。」
行運宜去發展快地方
蘇民峰直言,一個人會移民到哪個地方,首先要看他的八字,算出其大運,大運每30年一轉,行木運會去東方;行火運會去南方;行金運會去西方;至於行水運則去北方。「唔係你想去就去,例如你行火運,但走去北方,轉頭你便返來。」
他舉例一個人正在行木運,會移民到東方的地區,這大方向無得揀,但移民的地方則可以揀。他續說,移民東方的地區可以選擇台灣、日本、美加西岸;南方的地區則可選澳洲、新西蘭、新加坡、馬來西亞;移民北方則以加拿大最熱門;而西方最熱門是移民歐洲。
有了移民的大方向,接下來看一個人的流年運程,看看是否正在行運來選擇合適地方。正在行運的人,適宜到經濟非常之活躍的地方,如果不是正在行運,就適宜去經濟發展慢的地方,「經濟慢嘅地方,個個都差不多,你唔係好覺自己唔行運;若你唔行運,去經濟快嘅地方,就被人打到落最底層。」例如正在行木運,會移民到東方的人,若非正在行運,較適宜移民到經濟發展較慢的台灣。
走遍各地還是香港好
一家大細齊齊移民,哪又應該看誰的八字?蘇民峰說,如果是老婆跟老公走,要睇老公的八字及方向;如果是小朋友出國讀書,一家人是陪小朋友讀書,則看小朋友的八字。不過,若只是送小朋友留學幾年,則不用考慮八字方向,「如果讀書幾年,唔係移民就唔駛睇方向,但移民係讀完書會留低工作,預計留十幾二十年,就要跟八字方向走,先會留下來,如果唔係嗰個運,讀完書會即刻走返來。」
不過,蘇民峰坦言,談移民除了玄學,還要顧及現實。他提醒港人移民前,千萬要了解移民目的地的真實情況,不要「唔知頭唔知路」去移民。他走遍世界各地,還是覺得香港最好,「我唔不會(移民),我全世界周圍去,最習慣就係住香港,香港又方便,治安又好,宜家就棘手啲。」而且正值青壯年者,要考慮移民外國,能否找到工作,長久生活,「去做生意則要承受到風險,睇你幾多歲,年輕先可以,(生意)死咗可以再來,但五六十歲(生意)死咗就翻唔到身。」
蘇師傅 瞬間看地球
馬來西亞
近年馬來西亞政府推出「第二家園」計劃,外國人符合指定要求便可長居大馬10年,50歲以下申請人須開設30萬令吉(約57萬港元)的定存戶口,50歲以上申請人則要定存15萬令吉(約29萬港元)。由於門檻甚低,近年深受港人歡迎。
蘇民峰在吉隆坡置業多年,坦言當地治安問題不得不察,「治安差到周街搶,揸電單車搶,我喺馬來西亞行街要除晒所有錶,我去Disco蒲,過對面馬路都一定要搭的士過去。」他又不諱言大馬貪污情況嚴重,港人未必習慣,「跟香港完全唔同世界,撞車可以畀錢搞掂,很多人完全唔知(當地)世界。一定要實地住下,同當地人傾偈,上網也可以搵下(馬來西亞)搶劫片段。」
台灣
台灣是不少港人的移民首選。蘇民峰太太是台灣人,他非常熟悉當地情況。他直言很多人不清楚台灣行大陸法,「打人唔駛坐監,所以台灣成日打架,政府唔會捉你,係睇你告唔告佢,好多人唔知頭唔知路。台灣物價係好平,但大學生出來做嘢搵2.2萬台幣,等於香港五六千蚊人工。(物價)平無用,除非你帶舊錢去退休養老你就得,搵食你真係死得,問題講長久生活!台灣無乜發展,個個去做生意到仆街(損手)返來,你估咁易生存?除非你喺鄉下搵個地方前舖後居,要睇下你嚮唔嚮往這些生活。」
他認為台灣只適合退休人士養老,「例如賣咗香港層樓,有千幾萬,喺台灣買個細樓退休。如果做生意,攞少少錢試下,蝕咗都唔死就OK。」
歐洲
葡萄牙數年前為了吸引投資移民,推出「黃金簽證」,只要在當地購買合資格物業便可換取居留權,例如投資價值不少於35萬歐元(約303萬港元)在舊房產重建項目,或投資50萬歐元(約433萬港元)的房地產。蘇民峰認為歐洲大城市生活費水平高,他今年10月到葡萄牙里斯本旅遊,「當地人都話無資格住Downtown,全部出Downtown外面住,(歐洲)所有大城市都貴到咁,除非你帶舊錢去退休,好多地方平,但平的九成都係鄉下。」蘇民峰每年也歐遊,他發覺歐洲歧視華人的情況愈來愈嚴重,「1998年開始我年年去米蘭,都20年,去年經驗就好差,好唔禮貌,唔知係咪被大陸人搞到咁樣。去法國又俾人歧視,除非你住鄉下,法國鄉下人OK。」
新加坡
毗鄰馬來西亞的新加坡,在治安、廉潔度上可算是與香港相似,但蘇民峰早前曾到當地旅遊,大嘆悶透。「今年去了幾日,試一試住金沙,人都死,本來去5日,Cut到去3日,去5日瓜得。無嘢玩無嘢食無嘢行,新加坡細到呢!新加坡治安係好,但你走去遊行示威,10分鐘就被警察捉走了,千祈唔好講政治!」
加拿大
加拿大向來是港人移民熱點,但蘇民峰嫌當地冬天太冷,他有不少學生已移居加拿大,他們不時在彼邦見面,「溫哥華算最好,但種族歧視都勁,中國人細膽成日被鬼佬恰;多倫多又凍到零下十幾度;有學生喺蒙特利爾,每年冬天也返香港,因為零下廿幾度;(去過)卡加利仲抵死,零下26度仲打風。」
美國
至於移民美國,蘇民峰不諱言美國生活水平高,「要睇你有無生存能力,我有朋友在三藩市,打兩份工才夠交租,佢一個人住一定要有車,車要保險,人要保險,加埋租屋、食飯,每個月啱啱夠開支。」
他這位朋友在美國做「月光族」,難以儲蓄,坦言擔心其退休生活。
年到60轉行 做YouTuber?
2020年,蘇民峰「登六」了,他算到自己60歲之後有30年運,「都唔知做乜好,有諗過搞網上算命程式,又懶得滯,因為要做好多嘢。又想開一個YouTube頻道教人睇相,賺到錢!你開YouTube打蘇民峰,個個靠我個名賺錢,(與其)俾人賺錢,不如我試下自己賺!」說完蘇師傅也哈哈大笑。
雖然工作大計多多,但他近年已過著「每月一遊」的半退休生活,明年的旅遊已計劃好,「暫時都Plan到2021年,今年12月去二世古滑雪,跟住去威士拿,再去新西蘭上船去澳洲,再去二世古滑雪,跟住5月泰國,6月可能去哥本哈根,衰到要去挪威上面啲峽睇風景,完全去到無地方去,(挪威)十幾日唔知會唔會悶,跟住再去倫敦、LA、夏威夷、東京。」他說明年每月只有幾天留在香港工作,而且留港時每天只工作3小時。
他近年大減工作量,也婉拒了不少訪問,惟獨是接受《iMoney》專訪,「做咗咁多年就繼續做(訪問)。」他自2009年起,每年農曆新年前接受《iMoney》專訪,從未間斷,至今已是第13次。蘇師傅分析來年股樓經濟,分享個人股樓實戰經歷,年年也知無不言,言無不盡,每年專訪也大受讀者歡迎。多謝蘇師傅!
【慎防受騙】偽冒《經濟通》投資群組頻現,切勿誤信騙徒,如有疑問,請循官方渠道查詢► 了解詳情