近期風水好似興搞合併，神州呢邊有國泰君安(02611)併購海通(06837)，寄望可以做到神州「券商巨無霸」。而外圍呢幾日當然就係最關心「OK吞7仔」，劇情發展到7仔母企Seven & i就正式拒絕Circle K母企Alimentation Couche-Tard(ACT)嘅每股14.86美金要約，但ACT並未就此死心，一定要食硬7仔！
上個月中傳出「OK吞7仔」傳聞，8月19號當日日經上市嘅Seven & i就「未公布先興奮」，大升兩成二完場。而呢一次大升都著實係有啲蹺起咗ACT，截至星期一Seven & i每股飆到上2200円，市值已經成400億美元，已經高過ACT提出嘅大約385億美元要約價，都難怪Seven & i可以企硬唔受「購」。
Seven & i方面就話，ACT出價唔夠高而且「充滿監管風險」，但就「願意真誠地考慮任何符合股東和其他利益相關者最佳利益的提議」，亦會「抵制任何剝奪股東獲得公司內在價值機會，或未能具體解決現實監管問題的提議」，即係拎多啲「誠意」先好嚟見我。
老實講如果兩大便利店合併成功，絕對係稱得上「便利店巨無霸」；全球有超過8.4萬間7仔，而ACT就有近1.7萬間便利店，合併成功就會喺全世界有超過10萬間便利店，實現世界級嘅「梗有一間喺左近」。
不過ACT要「買起最大對手」呢一步一啲都唔易行，事實上ACT市值都係大約580億美金，只係比Seven & i高一啲，不相伯仲之下Seven & i確實係有話語權。但ACT都唔係善男信女，被請食檸檬之後就重申有意繼續收購，更加唔排除會「惡意收購」，在商言商無謂做到咁難睇，目前都係「善意收購」嘅可能性大啲，不過上一次出價出手太低，難免洩咗道氣。
近期興搞合併收購實則上都唔只係風水好，亦都同減息有關，減息有利股市，借錢收購成本都一定會減低，於是就吸引ACT呢個時候出手。但有評論認為7-11都算係日本由本地出海嘅國際企業，除咗Seven & i嘅擁有人伊藤家族，甚至到日本政府都有自己考量，應唔應該容許外國資金加大喺日本企業嘅控制權，等等都係呢一場收購會牽涉嘅考量。
而實際上，7仔同OK喺北美一樣咁高市佔，合併成功後可能會引起美國反壟斷機構嘅審查，呢一點就係Seven & i提到嘅「充滿監管風險」，明顯OK目前係未有相關嘅解決辦法，亦係佢要繼續收購嘅必要考慮問題，請請！
*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。
【與拍賣官看藝術】常玉作品屢創天價，背後其實藏著跌宕起伏的人生► 即睇
