《小傳日記》比特幣破十萬美圖悔賣早，虛幣概念股亂舞勿盲目追風

　　今日比特幣突破咗10萬美元啦！大家都為美圖公司(01357)覺得好可惜，點解咁講呢？原來噚日美圖公司宣布，自11月就已經開始拋售虛擬貨幣，截至噚日（4號）已經賣晒手頭上所有嘅加密貨幣，涉及金額有大約1.8億美金，折合超過14億銀。而且仲勁賺7963萬美金，差唔多6.2億銀嘅利潤添！要知道，美圖2022年經調整利潤淨額先得1.1億銀，2023年都只系3.7億銀，今次炒幣賺嘅錢仲高過正經做業務嘅收入添！

　　公司仲鬼死咁大方，打算將出售獲利淨額嘅八成攞來派特別股息，每股派10.9仙，相信唔少小股東都會感動到喊！今日美圖嘅股價亦大升，美圖公司最高升到3.12銀，漲幅高達9%。

　　美圖套現派息呢一招出咗之後，市場好似炸開鍋，將目標轉向其他虛擬貨幣概念股，憧憬其他虛擬貨幣概念股都會效仿美圖賺錢派息。其中升得最甘嘅就系博雅互動(00434)，飆咗接近三成！根據博雅互動最新嘅公告，佢累計持有3183枚比特幣，按照而家比特幣嘅價格計算，如果拋晒所有比特幣，就可以套現三千幾萬美元，折合超過2.5億銀，扣除成本都淨賺1.1億銀。

　　換作以前，如果有間上市公司將大把資金拿去買比特幣呢類具有風險嘅資產，大家肯定覺得呢間公司不務正業，無嘢好搞先會走去炒幣。但而家唔同晒啦，好多人都後悔以前冇all in虛擬貨幣。睇返博雅互動嘅走勢就知虛擬貨幣概念股有幾熱炒，股價從年初嘅0.5銀，一路飆升到今日嘅6.1銀每股，年內漲幅超10倍。內媒話，佢系目前港股升幅最高嘅個股，亦系目前唯一年內10倍嘅個股。

　　不過話時話，炒幣真系好似玩心跳咁，風險超大。美圖一開始炒幣嘅時候其實都唔係一帆風順㗎。前兩年比特幣價格好似坐滑梯咁，美圖公司每年都要做減值撥備。好似2022年，公司買嘅以太幣同比特幣嘅市值大縮水，造成當年接近三億人仔嘅帳面虧損。到咗2023年，加密貨幣價格有所回升，美圖先至可以將之前嘅虧損撥回2.7億人仔盈利。

　　可能好多人見到美圖套現派息都心郁郁想買入比特幣概念股，但筆者在此要提醒大家，一定要謹慎！好似十一月嘅比特幣表現，低嘅時候見過66835美金，高嘅時候又去到99588美金，波動幅度極大。虛擬貨幣概念股嘅表現亦會跟住大起大落，所以投資嘅時候千祈唔好盲目跟風。要先了解清楚公司嘅基本面，好似美圖咁，雖然今次炒幣成功，但之前都有虧損嘅時候。仲有要衡量自己嘅風險承受能力，唔好貪心，適可而止。請請！

*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。