《小傳日記》五千億成交全因政策市！咁大粒星點托先唔跌？

　　魚缸成交再創新高！勢估唔到魚缸單日4400億銀都未到盡頭，今日竟然再創新高，大破5000億成交額大關，收市造5058億成交額再創歷史新一頁。
　　今次有咁大成交都係全靠阿爺連環一招又一招驅動，被孖屐稱之為「政策市」。對上一次魚缸有咁大成交都係政策市，要數到2022年3月。回想當時，俄烏啱啱開打，全球市場氣氛都已經唔好，加上中美爭端喺當時進一步發酵。當時美國證交會指有好多喺美國上市嘅中資公司都未能符合上市要求，因為無交審計底稿。美國證交所當時話，假如中概股連續三年未能符合上市規定，就有權將股份強制除牌。
　　當時成個孖屐都非常擔心中概股會成為中美角力嘅磨心，因為神州企業會從此少咁個海外集資嘅渠道。當時恒指由2月中跌到3月中，跌幅已經超過6000點，阿爺都深明拆彈係刻不容緩。但當時中資公司對於數據出境非常敏感，尤其係部分涉及國資而又喺美國市場有ADR嘅，假如會計底稿就咁釋出，就會畀美國方面由國企資金流方面推斷得到阿爺嘅財政狀況，呢個就係當時最為棹忌嘅一點。
　　最後經歷中美雙方斡旋，最終時任國務院副總理劉鶴宣布「中美雙方監管機構取得積極進展」，一句就令魚缸反彈，因為事涉多隻大型科技股，魚缸一彈就隨便ATM都可以有兩至三成升幅，成就魚缸連續兩日成交都過3000億嘅紀錄，而事件最後都以國企股份由美國退市告終。
　　睇返今日，其實同上次差唔多嘅係都一樣係政策市，都係因為政治或者政策消息而大升。但今次唔同係恒指已經再跌多咗，而且今次係並無牽涉外圍，而單係靠阿爺力谷返嚟。而力谷嘅結果就係12個交易日內大升超過4000點，咁樣嘅升法以理論而言都唔係幾健康，加上政策市係炒消息，嚴格嚟講都係投機，咁樣嘅市點都係波動好多。睇返今日走勢，日線圖上又見超大十字星，技術係極大嘅轉勢訊號，但政策市講唔埋，可能星期三又有新大力政策出呢，請請！

*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。